Olalla Rodil reivindica en Viveiro o dereito da Mariña a contar cunhas infraestruturas de comunicación propias do século XXI

A Mariña, 19 de xuño de 2016. Olalla Rodil participou nun acto informativo en Viveiro no que o BNG – Nós Candidatura Galega reclamou o dereito da comarca a contar cunhas infraestruturas de comunicación acordes coa poboación e a capacidade produtiva e económica da Mariña. A cabeza de lista pola circunscrición de Lugo da candidatura nacionalista cualificou de insulto á intelixencia o atraso de mais de 10 anos na autovía entre Barreiros e San Cibrao e a súa conexión con Ferrol. No caso das liñas ferroviarias, practicamente inexistentes e totalmente ineficientes na comarca para a poboación e mercadorías. O BNG ven defendendo practicamente en solitario entre a s forzas políticas, a necesidade estratéxica de abrir o dique norte de Morás ao tráfico comercial.

Nun acto informativo no que participaron as candidatas un e tres da candidatura do BNG – NÓS ao congreso, Olalla Rodil e Montse Porteiro, mais a responsábel comarcal do BNG, Ana Ermida, no mercado dominical de Viveiro, as candidatas volveron incidir na necesidade do desbloqueo das infraestruturas de comunicación na comarca.
É incomprensíbel o atraso de mais de 10 anos na prometida autovía entre Barreiros e San Cibrao de competencia estatal, para a que nin sequera está redactado o proxecto construtivo. Outro tanto sucede coa variante de Viveiro que forma parte da VAP entre San Cibrao e Ferrol que sofre o mesmo atraso. As usuarias e usuarios da N642 sofren tódolos días as fochancas, as travesías e as dificultades para cruzar a comarca desde Viveiro a Ribadeo sen que se vexan a curto e medio prazo solucións a pesar do potencial económico e poboacional da comarca que se ve recurtado pola falta destas infraestruturas por estrada.

BNG – NÓS reclamou unhas infraestruturas ferroviarias acordes coas necesidades da poboación e tamén da industria. Un tren con maiores frecuencias, con vocación de cercanías, con dobre vía que permita transporte de mercadorías e persoas cunha velocidade acorde ao século XXI e que conecte a comarca co eixo atlántico e coas comunidades cantábricas ate Iruña. O Partido Popular chegou a prometer un AVE cantábrico, ao entender do BNG inservíbel, mais o que quedou foi un ferrocarril de vía estreita practicamente inservíbel que tampouco conecta a comarca co interior de Galiza.

O BNG defende en solitario a apertura do dique norte de Morás ao tráfico comercial como unha infraestrutura estratéxica para o futuro da comarca. Mentres as outras forzas políticas calan ou miran cara outro lado, hai sectores económicos como o forestal de gran importancia na Mariña, que o reclama para esquivar o monopolio de ENCE. A apertura deste peirao abriría expectativas de emprego para mais de 400 persoas e servirá para crear inercias económicas de cara a manter e impulsar o dinamismo económico da comarca.

Para Olalla Rodil e Montse Porteiro fronte ao de sempre, ou os discursos baleiros condicionados por forzas políticas estatais, o BNG – NÓS ofrece a garantía dunha representación propia, coa cabeza e o corazón posto unicamente en Galiza co aval do traballo de mais de 20 anos das deputadas e deputados do BNG que representaron a Galiza en Madrid sen mais condicións que poñer voz ao problemas e demandas de galegas e galegos.

BNG – NÓS nun escenario como o que se vai dar de ausencia de maiorías absolutas, será chave para decidir, como xa o ten sido noutras ocasións, e non dará cheques en branco ás formación políticas estatais sexan dun ou doutro polo ideolóxico, si nas propostas de goberno non se poñen por diante os intereses de Galiza, algo que so pode ofrecer o BNG – NÓS.