O Concello de Cervo iza a bandeira azul na praia do Torno que lucirá tamén o distintivo de ‘Ecoplaya’

Cervo, 2 de xullo de 2016. O Concello de Cervo izou este sábado a bandeira azul na praia do Torno. O areal lucirá este ano ademais o distintivo Ecoplaya, recoñecemento do compromiso adicional do Concello co medio ambiente.

A concelleira de Medio Ambiente, Manuela Méndez, subliñou que “o Concello de Cervo izou na praia do Torno, como xa fixo o ano pasado, a bandeira azul, un distintivo que tanto nos gusta ter en todos os concellos porque iso significa que as praias teñen unha calidade de auga e nos areais moi boa”.

Manuela Méndez salientou que “este ano o concello de Cervo vai sumar unha bandeira máis, porque ademais da bandeira azul imos ter o que chaman a de Ecoplaya”.

A responsable de Medio Ambiente no concello cervense comentou que “a bandeira Ecoplaya é aínda un reforzo máis para o compromiso do Concello coa praia. Isto significa que, como no caso da bandeira azul, a calidade das augas, os equipamentos e demais son as máis óptimas”.

Manuela Méndez engadiu que “o Concello de Cervo síntese moi orgulloso de seguir sumando galardóns para os nosos areais e esa é a nosa aposta: converter o noso concello nun lugar onde o medio ambiente sexa o noso punto forte. Sabemos que aínda quedan moitas cousas por facer, pero seguro que co esforzo de todos ímolo conseguir”.