Ata 5 metais para o club IADOVI no VI Trofeo Castelarco do Valadouro

O Valadouro acollía o VI Trofeo Castelarco en aire libre onde os arqueiros do IADOVI de San Cibrao destacaron con luz propia debido ao seu alto nivel técnico que os levaba ao podio.

Así, na categoría Veteranos de arco recurvo José Manuel García Cordido “O Campaneiro” facía o seu debú na categoría e distancia. Sobre unha puntuación máxima de 720 puntos lograba os 551 que o levarían á segunda escada do podio. Por outro lado, José María Cerdeiras conseguía os 528 que o colocaban na cuarta posición, a tan so 10 puntos da terceira praza.

Ana María Briones, a represenante do club na categoría senior dama, alzábase co primeiro posto tras conseguir os 531 puntos. E os seus fillos seguíanlle os pasos.

Gabriel Galante Briones facía o propio na súa categoría de cadete onde, cos 648 puntos conseguidos na proba ademais da primera posición rompe o seu record persoal de 642 puntos conseguido no segundo encontro da liga nacional de cadetes. Queda demostrado así que se atopa preparado para dar guerra no próximo campionato de España de aire libre para cadetes que se celebrará o 15 deste mes en Salamanca ao que acudirá representando a Galicia xunto ao seu compañeiro de club, ausente neste trofeo, Francisco Bothelo Melo.

Ángel Galante Briones na súa categoría de recurvo infantil con 527 puntos batía por 2 puntos ao actual campión de Galicia, Juan de Dios Rodríguez, do Club Arco Ferrol, e subía ao primeiro posto do podio.

Sergio López Delantero participaba na categoría noveis, e tras superar os nervios do principiante nas primeiras series lograba situarse en cabeceira tras finalizar a primeira serie por unha marxe de 13 puntos fronte ao arqueiro local Juan José Cortiñas. Despois do descanso cunhas series moi reñidas entre ambos arqueiros, Sergio lograba avantaxar ao seu rival tan so por 2 puntos, conseguindo os 567 puntos que lle daban a vitoria.