O BNG de Viveiro propón á concelleira de cultura organizar visitas guiadas á exposición que conmemora os 100 anos das Irmandades da Fala: Saúde e Terra, irmá(n)s!

Viveiro, 8 de novembro de 2016.- O BNG de Viveiro cre que a Exposición “Saúde e Terra, Irmáns”, que acolle desde o venres pasado a sala de Exposicións do pazo de San Marcos de Lugo, pode ser para as veciñas e veciños de Viveiro (adult@s e nen@s) unha oportunidade inmellorable para coñecer o legado dos homes e mulleres das Irmandades da Fala, e cuxos promotores e activistas principais foron os irmáns viveirenses Vilar Ponte. Un movemento concebido por Antón e Ramón coa arela de estender o uso do galego a todos os contextos orais e escritos que se espallou rapidamente por Galiza, promovendo ademais un novo rexurdimento cultural e tamén unha nova etapa do galeguismo político.

@s nacionalistas de Viveiro animan á concelleira de cultura, Lara Fernández, a traballar a prol da cultura galega e d@s viveirenses facilitándolles a oportunidade de coñecer, a través desta mostra de 130 pezas que conmemora os 100 anos da fundación das Irmandades da Fala, a orixe dunha etapa fundamental da nosa terra, que axudou á normalización da nosa lingua, ao rexurdimento literario, ao compromiso coa cultura e a identidade galega e que apostou desde os seus comezos pola “igualdade absoluta, política e civil da muller e do home”. O BNG de Viveiro convida ao concello e á sra. Fernández a organizar visitas guiadas á exposición “Saúde e Terra, Irmá(n)s, posto que ademais e facéndose eco das palabras pronunciadas pola propia concelleira durante o acto conmemorativo do centenario das Irmandades da Fala organizado pola RAG e o Concello de Viveiro “actos como estes son precisos para que figuras como as dos irmáns Vilar Ponte non caian no esquecemento entre as novas xeracións”.