LUGO .- O pleno da deputación acordou solicita á administración autonómica e a Fomento un cronograma con prazos e orzamento suficiente para rematar a Vía de Alta Capacidade Barreiros-Ferrol antes de 2014. Tamén aprobou o Plan de Comunidades Veciñais de 2009, a través do que se acometerán obras por valor de 3,7 millóns de euros, e do que se benefician 295 entidades asociativas da provincia.
Nota de Prensa
A Deputación insta á Xunta a que se cumpran os prazos para a construción dos accesos ó Porto Seco de Monforte
– O organismo provincial solicita á administración autonómica e a Fomento a acordar un cronograma con prazos e orzamento suficiente para rematar a Vía de Alta Capacidade Barreiros-Ferrol antes de 2014
– O Pleno aprobou por unanimidade o Plan de Comunidades Veciñais de 2009, a través do que se acometerán obras por valor de 3,7 M€, e do que se benefician 295 entidades asociativas da provincia
– Cos remanentes producidos do Plan de Obras e Servizos de 2009, a Deputación executará obras nos Concellos de Navia de Suarna e Pobra de Brollón
O Pleno da Deputación aprobou este martes, coa abstención do PP, a proposta do equipo de goberno na que se insta á Xunta de Galicia a cumprir o convenio asinado no Concello de Monforte polas Consellerías de Política Territorial e Vivenda para a construción dos accesos ó Porto Seco nos prazos establecidos, co fin de non retrasar a entrada en funcionamento desta plataforma loxística tan importante para esta comarca e para todo o interior de Galicia. En 2001 fóra presentado neste municipio o proxecto desta infraestrutura que naceu para interrelacionar comercialmente cos Portos de Coruña e Vigo, sendo un referente para a vía de entrada e saída das mercadorías da Comunidade Autónoma.
A finais de 2005, tan só o Ministerio de Fomento cumprira co acordo establecido e que incluía a conexión coa rede ferroviaria, a construción de dúas vías de comunicación e da plataforma de formigón de entrevías para carga e descarga dos contendores. Pola contra, a Xunta de Galicia a esa data non realizou ningunha xestión das que tiña comprometido para a construción integral e a operatividade do Porto Seco. O voceiro provincial socialista, Antonio Gato, subliñou que “na pasada lexislatura, a administración autonómica, aprobou o Proxecto Sectorial, comprou e adxudicou os terreos e deixou feito o Estudo informativo e a Declaración de Impacto Ambiental, quedando pendente a redacción e a construción da estrada de accesos”.
O Goberno da Xunta tiña comprometido a construción deste vial en 2010. Recentemente, a Directora Xeral de Infraestruturas da Consellería de Medio Ambiente anunciou no Parlamento que o actual equipo de goberno autonómico non prevía o remate das obras de acceso ó Porto Secto ata 2013. Ademais, os Orzamentos da Xunta para o vindeiro ano só contemplan a cantidade de 460.000 euros, unha cantidade insuficiente, xa que o custe dos accesos ronda os 10 millóns de euros. Antonio Gato destacou que “é un recorte espectacular, o que leva consigo inexcusablemente unha tardanza na construción do Porto Seco. Tan só o Ministerio cumpriu de forma clara e decisiva. Esta é a política de Feijóo, baseada en facer caixa, polo que señor Barcia, agora terán que ir a Monforte a explicar que o convenio asinado non ten ningún sostén”.
Vía de alta capacidade Barreiros-Ferrol
Asimesmo, aprobouse coa abstención de Manuel Varela a proposta de acordo do equipo de goberno na que se solicita ó Goberno do Estado e á Xunta de Galicia a que se se cumpran os prazos de execución da obra de autovía de conexión entre San Cibrao e Barreiros unha vez que sexa aprobado o seu estudo informativo, e as datas de licitación das obras do treito entre Ferrol e San Cibrao que na actualidade se atopan en fase de redacción de proxecto. En definitiva, o que propón o organismo provincial é que se acorde un cronograma con prazos e consignacións orzamentarias suficientes que permitan rematar a vía de Alta Capacidade Barreiros-Ferrol antes de 2014.
A Vía de Alta Capacidade do Litoral (treito San Cibrao-Ferrol) a executar pola Xunta de Galicia ten unha lonxitude de 88 quilómetros e discorre polas comarcas da Mariña, Ortegal e Ferrolterra. O prazo de execución do corredor era de seis anos (2001-2007). Malia que se trata dunha obra que xa tiña que estar rematada a día de hoxe, só dous treitos están licitados e os investimentos que se recollen nas contas públicas para 2010 son insuficientes.
Polo que se refire ó de Barreiros-San Cibrao, a realizar polo Ministerio de Fomento entre os anos 2001-2007, ten forma de autovía e unha distanza 30 quilómetros. Afecta ós Concellos de Barreiros, Foz, Burela e Cervo. Nestes momentos, o Estado só ten executado o estudo informativo do trazado, que foi sometido ó trámite de exposición pública.
Violencia de Xénero
Acordouse con por unanimidade instar tamén á administración autonómica a que realice unha planificación para a efectividade das previsións contidas na Lei 11/2007 que estaban pendentes de desenvolvemento para erradicar a violencia de xénero. Isto débese a que as propostas da Secretaría Xeral de Igualdade amosadas no Parlamento non responden á posta en funcionamento deste instrumento lexislativo, que contempla a creación do Observatorio Galego de Violencia de Xénero e do Centro de Recuperación Integral, realizar campañas periódicas de sensibilización contra esta lacra social, a formación da totalidade dos profesionais, e garantir o dereito á atención psicolóxica no eido sanitario público.
Plan de Comunidades Veciñais 2009
O Pleno ratificou por unanimidade o Plan de Comunidades Veciñais de 2009. A través desta iniciativa, o organismo provincial acometerá obras nos Concellos da provincia por valor de 3,7 millóns de euros. Desta cantidade, a Deputación inviste 2,2 millóns, o que representa o 60% do orzamento total.
En total beneficiaranse 295 entidades asociativas de Lugo. As axudas que concede a institución provincial para calquera das actuacións non supera os 12.000 euros, é dicir, o 75% do importe total da obra, de tal xeito, que o 25% restante debe ser sufragado polos colectivos veciñais.
Remanentes POS 2009
O Pleno da Corporación provincial aprobou, coa abstención do PP, os remanentes producidos na contratación das obras do Plan de Obras e Servizos de 2009 que conta cun investimento 6.326.168,96 euros, dos que a Deputación aporta 2.056.004 euros, o MAP 3.163.084 euros e os Concellos 1.107.079,74 euros.
Neste senso, acórdase dar de baixa a obra que inclúe o saneamento do núcleo de Santalla de Rei, en Pobra de Brollón, na que estaba previsto investir 54.873 euros. Deste xeito, cos remanentes obtidos na contratación das obras e coa anulación da anterior, dotarase de financiamento as seguintes no Plan Complementario: acondicionamento de Muñis a Rao, no Concello de Navia de Suarna, dende o punto quilométrico 5,000 ó 7,700 por valor de 285.384 euros; e continuación do saneamento do no núcleo de Santalla de Rei ó que se destinan 34.825 euros.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continúa con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
Finalizado o encontro, de carácter privado, o Cónsul asinou no Libro de Ouro da Deputación e a Presidenta fíxolle entrega dun agasallo institucional. Trala xuntanza Carmela López manifestou a súa satisfacción porque “traballamos para avanzar en novas vías de colaboración, e en posibles proxectos que serven para reforzar a relación entre a Deputación e o veciño país de Portugal”.
