O Concello de Ribadeo levará a cabo obras de saneamento nas parroquias de Ove e Couxela. O presuposto ascende a 36.000 euros e está financiado íntegramente por fondos municipais

Ribadeo, 17 de agosto de 2017. O Concello levará a cabo obras de saneamento nas parroquias de Ove e Couxela. O presupostos global ascende a 36.000 euros procedentes de fondos municipais. As empresas interesadas teñen de prazo ata o día 25 deste mes para presentar as súas ofertas.
O alcalde, Fernando Suárez, anunciou que “estes días temos en licitación, está colgado no perfil do contratante, un proxecto que queremos facer nas parroquias de Ove e Couxela. Queremos reforzar a rede de abastecemento de auga que vai a Seixadelo e concretamente tamén a Santa Cruz, á Casa da Ría, que é propiedade municipal. Dende hai moito tempo temos graves problemas, dado que hai un pozo que seca moitas veces e non temos operatividade na Casa da Ría, en Santa Cruz, e de paso queremos reforzar o subministro que vai a Seixadelo, outro barrio que queda alí cerca”.
O rexedor contou que “por outra banda, na parroquia de Couxela queremos reforzar o subministro no núcleo de Casas Novas. Alí teñen pouca presión dende hai tempo e están bastante preocupados naquela zona, e de paso queremos facer un novo ramal para abastecer ao núcleo de Moural”.
Fernando Suárez dixo que “contamos con todos os permisos autonómicos da comisión dos Camiños de Santiago e tamén da Deputación Provincial de Lugo por discorrer esta nova acometida no que ten que ver coa parroquia de Ove por vieiros das súas competencias”.
O alcalde engadiu que “o proxecto global son uns 36.000 euros e a empresa adxudicataria terá o prazo dun mes para executar estas obras. Polo tanto convidamos a todas aquelas empresas que o desexen que poden consultar o perfil do contratante ata o 25 de agosto”.
Fernando Suárez subliñou que “a totalidade destes recursos económicos saen de fondos propios, de fondos municipais do Concello de Ribadeo”.