O Concello de Foz realizará un inventario de fincas e bens municipais. O Alcalde asinou este xoves o contrato coa empresa que executará ese traballo

Foz, 5 de outubro de 2017. O Concello de Foz asinou hoxe, xoves, o contrato coa empresa que realizará o inventario de fincas e bens municipais cun investimento de 16.000 euros. O alcalde focense, Javier Jorge Castiñeira, subliñou que servirá para mellorar a seguridade xurídica do Concello e tamén das asociacións e veciños particulares.
Javier Castiñeira anunciou: “no día de hoxe vimos de firmar no Concello de Foz coa empresa PROCAT Ingeniería y Medio Ambiente S.L. o contrato para realizar o inventario de fincas e bens municipais, por un valor de 16.000 euros, IVE incluído, a cargo do Plan Único da Deputación, que permite a todos os concellos dispoñer dunha serie de fondos para diferentes inversións ou, como neste caso, para a elaboración de diferentes documentos necesarios no noso Concello”.
O rexedor municipal salientou que “o inventario de fincas e ben municipais é moi necesario porque mellora a seguridade xurídica do Concello pero tamén das asociacións e dos veciños que ás veces compartimos ou temos fincas afectadas que teñen dubidosa titularidade. Non soamente pola titularidade senón porque iso conleva ás veces ter que renunciar a certas subvencións por non ter definida a titularidade. Polo tanto dará seguridade xurídica para todos que nos evitará moitísimos problemas”.
Castiñeira engadiu que “é un documento que xa tiña que estar feito desde hai moito tempo. Tanto este, de fincas e bens municipais, como o que xa está en exposición ao público, que é o de camiños públicos, son dous documentos que van axudar moito ao Concello a resolver problemas e eliminar ás veces tensións entre asociacións, veciños e tamén o propio Concello”.
O alcalde mostrouse “contento de que o Plan Único da Deputación serva para mellorar isto. É tamén un obxectivo cumprido, o compromiso da corporación municipal, porque en varias mocións e plenos saíu a necesidade de ter que elaborar estes dous documentos. En pouco espazo de tempo terémolos xa a disposición do Concello e facilitaranos moitísimo as cousas para mellorar a viabilidade da administración e sobre todo para non ter os problemas que ás veces trae o non ter estes documentos”.