O Goberno da Deputación ofrece no CENTRAD obradoiros de xoiaría, coiro, cestería, madeira e encadernación

Lugo, 9 de novembro de 2017. A Deputada de Cultura, Deseño e Artesanía, Pilar García Porto, presentou este xoves no CENTRAD (Centro de Artesanía e Deseño), a programación de outono que ofrece o Goberno da Deputación para realizar obradoiros de xoiaría, coiro, cestería, madeira e encadernación. Os interesados deben inscribirse no correo electrónico, formación.centrad@deputaciondelugo.org, ou no telefono 982 21 00 66.

A Deputada avanzou que son un “total de 36 prazas ás que se ofertan nos diferentes obradoiros co fin de dar resposta á demanda, e tamén para dar a oportunidade a calquera persoa, sen ser profesional da artesanía co fin de que poida coñecer de preto estes oficios, e incluso realizar algunha peza, como é o caso dos obradoiros de xoiaría ou coiro que nos que poderán elaborar pezas propias e únicas. Polo tanto convertese nunha oportunidade única para coñecer oficios tradicionais, e ao mesmo tempo unha boa oportunidade para poñelos en valor”, resumiu.

García Porto lembrou que nestes momentos no CENTRAD estase realizando un Obradoiro de GIGA e de Rota, que imparte o prestixioso luthier francés, Christian Rault. “Polo tanto, o Goberno da Deputación atende ao sector máis profesional do mundo das artes, e ao mesmo tempo ofrece actividades e programas para aqueles usuarios que non teñen tanta formación, pero queren achegarse a estes oficios”.

No que se refire á programación, García Porto avanzou que o Obradoiro de Xoiaría terá lugar dende o 20 de novembro ao 1 de decembro, e dende o 11 ao 13 de decembro. O horario para impartilo será de 16:30 a 20:30 horas no CENTRAD, cunha duración de 52 horas para 6 alumnos. Os alumnos que participen, e que conta cunha matricula de 26 euros, obterán coñecementos sobre introdución ás técnicas básicas e nos procedementos básicos de fabricación de xoias e aprender a bocetar un deseño. Ademais os participantes poderán experimentar a fabricación dunha peza propia.

No curso de coiro, os 10 alumnos coñecerán os diferentes tipos de coiro e as ferramentas máis comúns para crear un taller. As datas nas que se celebrará será dende o 20 ao 29 de novembro, dende ás 16:00 a 21:00 horas, e ten un custo de 20 euros. Ademais os participantes poderán realizar exercicios prácticos con distintas técnicas de cosido e a realización de pezas.

Á iniciación da cestería celebrarase dende o 11 ao 15 de novembro no Taller de cestería do Río Rato, de luns a venres dende ás 09:00 a 14:00 horas, nun total de 25 horas que se impartirán a 10 alumnos, e conta cunha matricula de 12;50 euros. Neste Obradoiro haberá unha breve reseña histórica deste patrimonio etnográfico galego. Os asistentes tamén poderán realizar unha peza de cestería.

Os docentes do CENTRAD, Joao Fernandes de Vrito e Alvaro Fernández Ferreiro impartirán un curso de madeira, concretamente de taller de moble. Celebrarase dende 22 ao 1, e dende 11 ata o 21 de decembro, cun horario dende ás 09:00 a 13:00 horas, os alumnos deberán achegar unha matricula de 40,50 euros. Neste Obradoiro realizaranse desmontaxe de ferraxes, decapado de aire quente, reparación de ebanistería, tratamento contra a couza ou tinguidura de madeira.

E por último curso de encadernación, da man de Diego López Villar, dende 11 ao 15, e dende o 18 ao 21 de decembro, nun horario de 10:00 a 13:00 horas, cun custe de 13,50 euros. Neste taller os asistentes coñecerán a encadernación xaponesa, a carpeta de anelas e o álbum de fotos.

Inscricións
Todos os interesados poden realizar a inscrición no correo electrónico, formación.centrad@deputaciondelugo.org, ou no teléfono 982 21 00 66. Os participantes nestes obradoiros deberán indicar no correo electrónico os seguintes datos; nome e apelidos, teléfono de contacto e indicar en cal das 5 programacións quere participar (xoiaría, coiro, cestería, madeira e encadernación). Na páxina web da Deputación haberá un banner con toda a información destes cursos.