Aprobadas no pleno as bases da convocatoria de subvencións dos ARIS de Ribadeo e de Rinlo. Na sesión tamén se deu luz verde ao proxecto técnico para a creación dun viario que unirá a rotonda da A-8 en Vilaselán coa Avenida Rafael Fernández Cardoso

Ribadeo, 20 de decembro de 2017. No pleno extraordinario celebrado onte no Concello de Ribadeo, aprobáronse as bases da convocatoria de subvencións dos ARIS de Ribadeo e de Rinlo. No caso da vila é o 12º convenio de rehabilitación e en Rinlo o 5º. A partir da súa publicación no Boletín Oficial da Provincia os propietarios de inmobles disporán dun mes para solicitar as axudas correspondentes.
O alcalde, Fernando Suárez, indicou que “neste pleno extraordinario, celebrado onte, basicamente aprobamos a orde de convocatoria de axudas para a rehabilitación de vivendas que estean no conxunto histórico do casco vello de Ribadeo e no de Rinlo, no senso de desenvolver o décimo segundo convenio de rehabilitación que temos asinado o Concello coa Xunta e o Ministerio para o casco vello de Ribadeo, e o quinto para Rinlo”.
O rexedor explicou que “a partires da publicación destas bases no Boletín Oficial da Provincia aqueles propietarios interesados poderán ter un mes de prazo para solicitar as axudas para a rehabilitación das súas vivendas. Suporán unha subvención máxima dun 35% do orzamento subvencionable cun límite de 11.000 euros e unha axuda complementaria do 10% tamén do gasto subvencionable cun límite de 4.000 euros”.
Suárez Barcia dixo que “o prazo para rematar estas obras e poder xustificar as subvención vai rematar a finais de novembro do ano que ven. Todo o mundo que queira a partires da publicación desta orde no BOP pode ir solicitándoas ou a partires de mañá mesmo poden achegarse á oficina de rehabilitación do Concello de Ribadeo para pedir máis información. A selección para outorgar estas axudas vai ser por criterios económicos, por mellora das condicións de habitabilidade e de accesibilidade das vivendas, tamén por condicións socioeconómicas e por medidas de aforro enerxético”.
O alcalde seguiu a relatar que “outro dos asuntos que onte se tratou no pleno, foi a aprobación inicial do proxecto de construción dun novo viario importante a modo de conexión entre a A-8, desde a rotonda de Vilaselán, para unir coa avenida Rafael Fernández Cardoso”.
Fernando Suárez subliñou que “foi aprobado por unanimidade, e quero destacar tamén o valor simbólico que iso ten porque somos dos poucos Concellos que ten plan xeral aprobado. Aprobado no mandato anterior tamén de xeito practicamente unánime, e máis aló das discrepancias que poidamos ter co resto de grupos en moitas outras cousas, no urbanismo estámonos levando todos ben, estámonos poñendo de acordo, e iso dálle unha potencia ao planeamento xeral de ordenación municipal moi grande. Sobre todo para articular este novos proxectos que están contemplados xa no plan xeral de ordenación municipal como é o caso, pero que queremos agora anticipar polo interese público”.
O rexedor lembrou que “desde a aprobación deste proxecto, e unha vez que sexa publicado no Boletín Oficial da Provincia, abrirase un período de exposición pública para que os propietarios afectados dos terreos, máis os veciños en xeral, poidan velo e poidan facer cantas suxestións e alegacións estimen oportunas”.
Segundo Fernando Suárez trátase “dunha actuación que está contemplada no PXOM vixente do 2014, e que se ben é unha obriga dos propietarios deses polígonos urbanísticos que teñen que facer todo isto, no Concello queremos acometer de xeito anticipado motivado nun interese público, sen prexuízo de que ata o último euro de inversión que o Concello teña que facer aí lle sexa no seu momento retornado a través das xuntas de compensación cando se desenvolva o resto de polígono urbanístico dese entorno”.
Para o alcalde ribadense “será moi importante que a xente poida chegar tamén ao centro de Ribadeo desde a autovía tendo un novo acceso que non sexa unicamente o da Avenida da Ría de Ribadeo, a través da rotonda de Dompiñor, senón que a través tamén desta rotonda de Vilaselán, que non está ao cen por cen operativa como debera ser, e que si a través deste novo viario pode dar moita máis permeabilidade aos accesos a Ribadeo, e por iso o Concello de Ribadeo dunha maneira unánime quere levar adiante este proxecto canto antes”.