Grupo municipal do Partido Popular de Ribadeo: “Dime de que presumes e direiche de que careces”

Está de actualidade o Antroido de Ribadeo polo ocorrido na Queima, celebrada o pasado sábado, porque resulta que o primeiro ano que o Concello é partícipe directo na organización desta festa xa xurdiu un problema porque o alcalde sacou as cousas de contexto, pois se algo ten o Antroido é mofa.
O alcalde usa unha vara de medir telescópica, que é diferente para uns e para outros, pois o ano pasado queimouse un Antroido coa bandeira dos Estados Unidos e hai uns anos ata se queimou outro cunha bandeira galega. Nós tamén estamos en contra de que se queimen bandeiras, pero neste caso non era iso, era un puro adorno que se quixo sacar de contexto.
Dicimos dime de que presumes e direiche de que careces porque desde a oposición notamos unha falta total de comunicación e de diálogo por parte do alcalde e do resto do goberno municipal. Vemos esta actuación súa como algo absolutista e ditatorial, que nos recorda a outros tempos nos que había censura. E neste asunto o señor Fernando Suárez actuou desa maneira, con censura, sen contar nin sequera coa outra parte na organización do Antroido. Foi un ordeno e mando do alcalde. E preguntámonos se non o faría así realmente porque apoia a Puigdemont e as súas decisións.
A falta de diálogo é algo habitual por parte deste goberno local, non só coa oposición senón que tamén actúan da mesma maneira coas asociacións, que se queixan porque non teñen en conta para nada as súas peticións.
Nós, como principal grupo da oposición no Concello, botamos moito en falta que cando se van tomar decisións importantes para Ribadeo non se convoque polo menos unha xunta de portavoces, para poder dar a nosa opinión. Temos un exemplo recente de que non se fai así: a aplicación da lei de montes da Xunta de Galicia por parte do Concello, sendo o primeiro da provincia de Lugo polo menos en tomar esta medida. Cremos que antes debería ter convocado unha reunión de portavoces para poder dar a nosa opinión porque na comisión forestal autonómica este asunto está moi verde aínda e non se sabe o que se vai facer. Pero aquí o Concello de Ribadeo xa está ameazando con sancións aos propietarios dos montes, o que nos parece lamentable.
Pero este caso é só un de moitos, porque en numerosas ocasións coñecemos as decisións que toma o alcalde pola prensa, pois aínda que somos membros da corporación municipal non recibimos información de moitos asuntos xa que este equipo de goberno actúa de forma absolutista. Como son dez concelleiros, ou incluso podemos dicir que once, fan o que queren, sen contar para nada coa opinión da oposición.
Esta forma de actuar habitual do alcalde, prepotente e ditatorial, quedou moi patente co que fixo o sábado da Queima do Antroido.
Outro exemplo desa actitude é que no balcón principal da Casa do Concello, que é a casa de todos os ribadenses, hai un pancarta partidista que leva colocada alí varios meses. E temos que aguantarnos todos os veciños, os que están de acordo e os que non, porque a puxo o equipo de goberno, que fai o que realmente lle dá a gana.
Temos un goberno municipal que presume de ser de esquerdas, de transparente, de respectar a opinión da cidadanía, pero o que vemos é todo o contrario: absolutismo, autoritarismo e falta de democracia. Cada vez queda máis claro que en Ribadeo faise o que o alcalde di única e exclusivamente, caia quen caia. E incluso chega ao extremo de non permitir a liberdade de expresión en actividades festivas e lúdicas, como acaba de ocorrer no Antroido.