15 deputados pídenlle ao Goberno do PSOE, con 10 deputados, que se implique no pagamento das nóminas ao persoal de Suplusa

Lugo 31, xullo, 2018. O Grupo Provincial do PP presentou unha moción de urxencia, que conseguiu sacar adiante co voto en contra do PSOE, para exixir que o Goberno Provincial coa maior axilidade posible solvente a situación producida en Suplusa para que os traballadores cobren as nóminas que se lle adebedan. O PP pídelle ao Goberno da Deputación que escoite á maioría do Pleno, 15 deputados, fronte aos 10 do PSOE, que se implique no pagamento das nóminas.

Elena Candia replicoulle ao voceiro e secretario xeral do PSOE que “en política non lle vale todo. Cómpre recordarllo. Non ten moita responsabilidade de goberno porque o que fai aquí o fai con bastante irresponsabilidade”. Así, lamentou que o voceiro do PSOE nin tan sequera disimulara o seu sorriso durante o debate da iniciativa.

A voceira do PP esgrimiu que a institución debera implicarse, aínda que censurou que ao PSOE “non lle preocupen demasiado eses 29 traballadores, nin os que lle prometeron traballo e despois non llo deron”.

“Fai escasos minutos dicíalle ao voceiro non adscrito que tiña que ir rozar a Augasmestas. Contan con eles para traballar pero non lles queren pagar”, expuxo.

Candia precisou que “existe un problema que vai máis alá da dicotomía Manuel Martínez-PSOE. Hai 29 persoas que non saben cando van cobrar a nómina. Temos a obriga de dar unha solución, non é analizar o pasado. Esta moción é para dar unha solución de futuro inmediato. Pedimos resolver o problema de xullo e a partir de aí a través dos informes xurídicos apoiaremos o nomeamento accidental ou a normativa que estea dentro da Lei”.

Desde o PP defenderon que existe un mecanismo que se pode poñer en marcha “e temos a obriga de facelo desde a Deputación e, por máis que intenten evadir responsabilidades, son responsables de que non cobren”. Os populares apostan por aplicar a base do artigo 35, “creo que é unha solución inmediata para que cobren e haxa tempo para cubrir esa praza, a mesma colaboración que se fai con moitos concellos da provincia”.

“Hai que resolver o problema porque hai 29 persoas que non están cobrando esa nómina”, pediu Candia, quen recordou que o deputado non adscrito preside Suplusa co voto a favor do PSOE.

As liortas internas levan a esta situación
Candia explicou que a esta situación se chegou polas loitas internas e polo odio inexplicable que teñen entre vostedes e que acabaron pagando as persoas seleccionadas en procesos como o das residencias. “O que non creo que lles quede dúbida é que hoxe tiñan a posibilidade de resolver esta situación, como fai con moitos concellos da provincia cando teñen vacantes de Intervención”. “Se alguén utiliza aos traballadores de Suplusa é o PSOE porque hoxe tiña ocasión de colaborar e poñer a disposición unha solución para acometer un gasto corrente previsible, como son as nóminas dos traballadores”, concluíu.