Teatro en Alfoz dentro do programa de dinamización lingüística ‘Falaredes’

Alfoz, 1 de novembro de 2018. A Área de Cultura e Turismo do Concello de Alfoz ten programado para maña, venres 2 de novembro ás 19:00 horas no Centro Sociocultural de Alfoz, o espectáculo teatral “Asubíos”, da compañía Elefante Elegante. Este evento, en colaboración coa Mancomunidade de Concellos da Mariña Lucense, enmárcase dentro do programa de dinamización do galego “FalaRedes”, deseñado pola Secretaría Xeral de Política Lingüística para os concellos da Rede de Dinamización Lingüística.
Nesta ocasión chega a Alfoz “Asubíos”, unha peza teatral dirixida a todos os públicos a partir de 3 anos e inspirada no universo literario do escritor mozambicano Mia Couto e no conto popular “O flautista de Hamelín” recollido polos irmáns Grimm. No espectáculo que a compañía Elefante Elegante crea para a Rede de Dinamización Lingüística, a temática xira arredor do medio natural e de como vivir en harmonía con el. Trátase dun alegato para unha vida respectuosa do ser humano coa terra que o acolle.
O programa FalaRedes ofrece actividades en galego para o tempo de lecer coa finalidade de ampliar a oferta de ocio no noso idioma, reforzar a oferta de actividades en galego dos concellos da Rede, promover o uso e valoración positiva da lingua propia de Galicia e apoiar os artistas que desenvolvan o seu traballo neste idioma.
Ase mesmo, seguindo co programa de Teatro de Outono, o sábado 3 de novembro ás 19:00 horas no Centro Sociocultural, terá lugar a representación da obra “Tren a Nápoles” da man do grupo teatral Unidade do Zono, dentro do circuíto de teatro afeccionado Buxiganga.