Burela 1-11-18. O Pescados Rubén Burela FS conseguiu esta tarde en Vista Alegre o billete para a fase final da XIII Copa Galicia Feminina fronte ao Valdetires FSF, de Segunda División. As Guerreiras Laranxas, que chegaron ao descanso con vantaxe de 3-0, ofreceron unha mellor versión na segunda parte, con máis velocidade, mellor circulación e máis ocasións, completando a festa goleadora ata o 8-1, fronte a un rival ao que lle puido o aspecto físico co paso dos minutos.
As pupilas de Julio Delgado e Lucas non tatexaron. Antes do ecuador da primeira parte, as Guerreiras Laranxas xa dispoñían dunha vantaxe de 3-0. Tras as dianas temperás de Alves e Dany (minuto 3 e 4), Cristina aproveitou en rexeitamento unha xogada pausada e pensada de Jenny para subir o terceiro. Alves, no 9, e Lara, no 12, volveron poñer moito perigo sobre a rede ferrolá, con Tamara como obstáculo. No minuto 14, a ex do Pescados Rubén Lidia Mesías dispuxo dun dobre penalti para acurtar distancias, que despexou Ana Romero cos puños. Sara salvou o cuarto das laranxas no minuto 17, de Dany, tras pase cruzado de Luci ante a saída da meta ferrolá.
Houbo cambio de protagonismo na custodia das redes, con Jozi e Uxía. Regresaron en avalancha as locais no segundo acto, ampliando a fenda ao 5-0 xa no minuto 22, con selo de Peque e de novo Dany. No 27, Cristina subiu o 6-0, moi atenta ao bordo da liña de meta, a pase de Alves, coa portería baleira. Sara foi a encargada de reducir distancias, no 33, para darlle folgos ao Valdetires. No entanto, as ocasións e o perigo seguiron tendo ton laranxa. No 36, a Jenny tan só lle fixo falta rozar co pé un pase alto ao bordo da área para rubricar o sétimo. O definitivo 8-1 asinouno Lara Balseiro, a falta de pouco máis de dous minutos para o final.
Ficha técnica
Pescados Rubén Burela FS: Ana Romero, Dany, Cilene, Alves, Luci, cinco inicial; tamén xogaron Cristina, Peque, Lara Balseiro, Jenny, Jozi
Valdetires FSF: Tamara, Lidia Mesías, Sara, Patri Corral, Jessica, cinco inicial; tamén xogaron Sheila, Alba Rodríguez, Diana, Ainhoa, Uxía
Árbitros: Menéndez Nistal // Coello Martínez (A Mariña). Por Valdetires amarela para Jessica (minuto 15).
Goles: 1-0, minuto 3, Alves; 2-0, minuto 4, Dany; 3-0, minuto 7, Cristina; 4-0, minuto 22, Peque; 5-0, minuto 22, Dany; 6-0, minuto 27, Cristina; 6-1, minuto 33, Sara; 7-1, minuto 36, Jenny; 8-1, minuto 38, Lara Balseiro
Incidencias: Partido correspondente á fase de grupos da XIII Copa Galicia Feminina disputado en Vista Alegre ante arredor de 500 persoas. O presidente, Manuel Blanco, e a vicepresidenta, Cesarina Fanego, fixeron entrega da recadación íntegra da taquilla á Protectora de Animais Bigotes de Burela.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
Este luns, 14 de setembro, deu comezo un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
