Ribadeo, 22 de maio de 2020. O alcalde, Fernando Suárez, vén de enviarlles sendas cartas aos presidentes da Xunta de Galicia e do Principado de Asturias solicitándolles que se dirixan ao Ministerio de Sanidade para conseguir que se permita a mobilidade entre Ribadeo e os concellos limítrofes do Occidente astur. Alude aos lazos afectivos, familiares e emocionais “entre unha poboación separada por unha raia administrativa” e ás relacións comerciais entre ambas zonas.
Na carta ao presidente galega, Alberto Núñez Feijóo, o rexedor subliña que “Ribadeo é unha vila que vive principalmente do sector terciario, dentro do cal cobra vital importancia a hostalaría e o comercio. Neste ámbito económico era significativo o número de veciños e veciñas dos concellos próximos pertencentes tanto á Mariña Luguesa como en igual medida ao Occidente Asturiano, que se desprazaban a diario até o noso concello coa fin de mercar ou tomar algo nos negocios locais, sendo este, como se indicou, o principal motor do desenvolvemento local ribadense. Por suposto, non se pode esquecer o importante número de ribadenses que de xeito ordinario fan uso do comercio asturiano no seu día a día”.
E engade que “por mor da problemática de saúde pública ocasionada polo Covid-19, dende o comezo do estado de alarma en marzo de 2020, pódese dicir que a economía local no municipio de Ribadeo paralizouse totalmente, de igual xeito por suposto que no resto do Estado. Dende logo, é indubidable que o impacto económico ocasionado por esta crise sanitaria é incalculable a día de hoxe e todos debemos arrimar o ombreiro para pouco a pouco, na medida do posible, ir retornando á nova normalidade que nos vai tocar vivir”.
Na misiva dirixida ao presidente asturiano, Adrián Barbón Rodríguez, o alcalde ribadense alude nos mesmos termos a esas as relacións comerciais que sempre mantiveron os veciños e veciñas de Ribadeo, da Mariña de Lugo e os do Occidente asturiano, que se viron interrompidas cando se decretou o estado de alarma.
Suárez Barcia indica que “o peche da nosa fronteira administrativa co Occidente de Asturias impiden que unha parte moi importante da poboación consumidora da nosa vila teña acceso ao municipio e viceversa”.
O alcalde de Ribadeo refírese ao artigo 9.2 do BOE publicado hoxe, 22 de maio, e no que se abre a posibilidade que dende as Comunidades Autónomas de Galicia e Asturias, conxuntamente, se lle solicite ao Ministerio de Sanidade abrir con carácter excepcional a fronteira entre os veciños e veciñas de Ribadeo e do Occidente asturiano para poñer fin a esta problemática que se lles traslada.
As cartas enviadas aos presidentes asturiano e galego rematan solicitándolles que, conxuntamente Asturias e Galicia, “formulen unha petición dirixida ao Ministerio de Sanidade para que na vindeira semana que entra esta necesidade poda ser unha realidade e, deste xeito, a mobilidade entre o Concello de Ribadeo e os respectivos Concellos do Occidente Asturiano sexa permitida, en base ao artigo 9.2 da Orde SND/427/2020 do Ministerio de Sanidade (BOE Núm. 144, do venres 22 de maio de 2020). Cómpre destacar que, por sorte dentro da gravidade desta situación, tanto a Provincia de Lugo como a Comunidade Autónoma Uniprovincial de Asturias non foron dos territorios estatais máis afectados polo COVID-19, atopándose ambos os dous lugares dentro da mesma Fase 1 de desescalada, e pasando o vindeiro luns á Fase 2, polo tanto cunha situación moi semellante a día de hoxe”.
Fernando Suárez Barcia agarda que “tomen de inmediato en consideración os argumentos que se relatan, sabendo que ao propoñelos, estámolo a facer coa cabeza e co corazón, e co compromiso a partes iguais de protección contra a pandemia que sufrimos e de reactivación ponderada da nosa economía local e comarcal, así como ao restablecemento dos lazos afectivos, familiares e emocionais entre unha poboación separada por una raia administrativa ao tempo que unida pola historia e pola relación continuada a través da mesma”.
Fernando Suárez diríxise aos presidentes da Xunta e do Principado solicitándolles que se dirixan ao Ministerio de Sanidade para conseguir que se permita a mobilidade entre Ribadeo e os concellos limítrofes do occidente astur
Relacionado
-
A Interfederativa de Confrarías analiza en Foz a sustentabilidade e rendibilidade da pesca artesanal
-
A Deputación pon en marcha un Centro de Innovación Territorial para promover o emprego na zona rural e fixar poboación
-
O PSdeG denuncia o abandono da estación de autobuses de Vilalba e reclama unha intervención inmediata da Xunta
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
O sindicato denuncia a decisión unilateral da empresa de retirar días de descanso e implantar quendas que dificultan a conciliación. As concentracións serán nos centros de traballo de Foz (Uxío Novoneira s/n) e Ribadeo (Avda. Galicia 27). Lémbrase que non é unha folga e apélase á solidariedade da plantilla para defender as condicións laborais conquistadas.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas deste martes, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
