FOZ.- ADEGA súmase á demanda da Universidade de promover a conservación do xacemento xeolóxico do areal de AREALONGA (FOZ) solicitando da Consellería de Medio Ambiente e Desenvolvemento Sostible a súa declaración como MONUMENTO NATURAL. Solicita tamén do concello de FOZ que se sume a esta petición para que, conxuntamente coa Dirección Xeral de Conservación da Natureza, interveñan ante a Dirección Xeral de Costas do Estado a fin de que se revise o proxecto previsto e podan ser conservados e postos en valor os valores científicos e culturais deste xacemento xeolóxico.
NOTA DE PRENSA
A Dirección Xeral para a Sustentabilidade da Costa e do Mar, do Ministerio do Medio Ambiente, por medio da Resolución publicada no BOE nº 142 do 12 de Xuño pasado, vén de adxudicar, nun importe total de 1.531.000 Euros, o proxecto denominado “Estudo integral de la playa de Arealonga y su entorno inmediato, fse I, término municipal de Foz”.
Este proxecto vai consistir na protección impermeable e ríxida, por medio de muro de formigón, do pé do talude todo ao longo do areal de Arealonga e previo a esta actuación levaráse a cabo o acondicionamento do referido talude mediante o retranqueo, en 5 m, do seu pé, a retirada de 70.000 m3 de terras máis o terraplenado de 3000 m3 máis, coa finalidade de facer unha remodelación da súa pendente ata conquerir unha relación 2,5H/1,0V, para acabar coa revexetación final do talude mediante sementeira por aspersión e a construcción dun paseo marítimo de 3 m de ancho na parte alta do talude así remodelado.
Todas estas accións, sen embargo, van sinificar a destrución do máis valioso xacemento xeolóxico e paleontolóxico do noso litoral, de enorme interese científico para o estudo do paleoclima e da flora, a fauna, a paisaxe e a ecoloxía dos útimos 120.000 anos que van dende o final do último período interglaciar (entre a glaciación do Riss e a glaciación do Würm) ata a actualidade. Sobre os valores científicos deste depósito xeolóxico de Arealonga, chega con citar as numerosas teses, traballos de investigación e publicacións científicas que se teñen feito sobre Arealonga, dende que nos anos sesenta o investigador francés Henri Nonn descubrira as zonas de turba da desembocadura do río Moucide. Dos traballos deste investigador francés, continuados e completados polo francés G. Mary e o alemán Brosche na década dos setenta e máis tarde por Díaz Fierros e Saá Otero, na década dos oitenta, e polo Laboratorio de Xeografía e Biodiversidade da universidade de Santiago na década dos noventa, podemos hoxe saber que se trata dun xacemento no que podemos encontrar un primeiro estrato de cantos rodados sobre o que se van superpoñendo alternativamente depósitos de turba e area dunar que abarcan todo o período da última glaciación ata a actualidade a partir dos que podemos reproducir, a través dos seus restos de esporas, polen e micro-restos de flora e fauna, as condicións climáticas e ecolóxicas que se sucederon durante os 120.000 últimos anos.
Á vista de todos estes valores científicos sobre os que, a través dos medios de comunicación, vén de advertirnos recentemente a Universidade de Santiago, a Asociación para a Defensa Ecolóxica de Galiza vén de dirixirse á Dirección Xeral de Conservación da Natureza solicitando da mesma que, acolléndose ao disposto na vixente lexislación de espazos protexidos, se inicie de inmediato o procedemento para declarar este xacemento xeolóxico e paleontolóxico como MONUMENTO NATURAL e para que, tamén de forma inmediata, se tomen todas as medidas necesarias para a conservación e protección do xacemento, e intervindo, polo tanto, ante a Dirección Xeral de Costas para que se proceda á revisión do proxecto de forma que poda ser compatible coa conservación dos seus valores científicos e culturais.
Por outra parte, habida conta de que os valores científicos e culturais deste xacemento de Arealonga, -debidamente conservados e postos en valor-, poden constituir un recurso didáctico de gran interese para toda a comunidade escolar e, ademais, un recurso económico turístico para, -complementariamente con outras actuacións como poden ser dotar ao xacemento dun dun aula de interpretación, a recuperación e posta en valor do castro colindante de Fazouro, a recuperación das antigas fábricas de salazón de Nois ou o apoio do Centro de interpretación da Mariña actualmente en execución-, diversificar a oferta turística da comarca, ADEGA vén de solicitar tamén do Concello de Foz que interveña ante a Dirección Xeral de Costas a fin de que se proceda á revisión do mencionado proxecto e os recursos económicos comprometidos no mesmo podan ser invertidos na conservación e posta en valor deste xacemento xeolóxico de primeira importancia.
Á vista dos informes da Universidade sobre o interese científico e cultural deste xacemento xeolóxico e á vista dos numerosos traballos de investigación e publicacións a que tén dado lugar, sería, dende logo, absolutamente indefendible que non souberamos protexelo, conservalo e poñelo en valor.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
