Cervo estuda levar aos xulgados á Xunta e á oposición

NOTA DE PRENSA

O grupo de goberno recomendalle ao nacionalista Estua que consulte o rexistro municipal antes de insinuar que o Concello non está a facer xestións para garantir as cantidades endebedadas pola promotora Astunosa

CERVO ESTUDA LEVAR AOS XULGADOS Á XUNTA E Á OPOSICIÓN POLOS DANOS OCASIONADOS COA SÚA PERSECUCIÓN POLÍTICA EN MATERIA DE URBANISMO

Cervo, 18 de outubro de 2008.- O Concello de Cervo está a facer “todo o que marca a lexislación” para reclamar o pago de 1,2 millóns de euros endebedados pola empresa Astunosa Servicios Inmobiliarios a esta administración local. Deste xeito queren aclarar as declaracións feitas polo voceiro nacionalista Xoán Antón Estúa, nas cales insinuaba que o Concello non estaba a adoptar ningún tipo de medidas neste senso.

Os responsables cervenses puntualizaron que o pasado 24 de setembro o Concello remitiu un escrito ao Xulgado do Mercantil número 7 de Madrid comunicando a existencia dos créditos que empresa Astunosa Servizos Inmobiliarios ten có consistorio “ao obxecto de que se poña en coñecemento da Administración concursal para que se inclúa ao Concello dentro da lista de acredores” da mencionada empresa.

A citada comunicación figura no rexistro de saída do Concello có número 3.587. “Rexistro ao cal ten acceso o señor Estúa. Por iso, non podemos máis que pensar que a súa única intención é sementar dúbidas entre os veciños do proceder do Concello” aseguraron.

Para os responsables locais, as criticas nacionalistas son un claro exemplo de “cinismo e hipocrisía política” e sostiveron que defenderán os intereses dos veciños “porque é a nosa obrigación e o noso compromiso”. Na súa opinión o BNG non pode botar a culpa ao Concello polas dificultades que pasa unha promotora de vivendas, porque o Goberno local “sempre actuou de forma responsable neste asunto”.

Aproveitaron tamén para recordáronlle a Estua que o seu partido adicouse a encher o concello “con panfletos intoxicantes” cando xa existían informes técnicos da Consellería de Política Territorial onde se acreditaba a legalidade das obras. “Foron os propios inspectores da Xunta os que dixeron que o solo onde están estas promocións é solo consolidado e que polo tanto nunca houbo razóns para discutir a legalidade destas 532 vivendas”. Neste senso lembraron que a Xunta non acudiu aos tribunais para requirir a anulación das licenzas á que se opuxo o Concello “e recoñeceron que a xustiza nunca lles daría a razón, a pesares de manter continuamente en dúbida a nosa xestión”.

En todo caso, suxeríronlle ao voceiro nacionalista que “se realmente busca algún tipo de irregularidade urbanística en Cervo sería mellor que lle preguntara aos membros do partido político que comparte con el oposición na corporación, e que, por certo, tamén é socio do seu partido na Xunta, porque eles deben de saber algo do tema”.

XUNTA E OPOSICIÓN AOS XULGADOS

O equipo de goberno adiantou tamén que dende o Concello estase a valorar a posibilidade de emprender accións xudiciais contra a Xunta de Galicia e contra os responsables dos partidos da oposición en Cervo. Na súa opinión a situación provocada pola consellería de Política Territorial “coa conivencia dos partidos da oposición cervense” asemellase a un posible caso de prevaricación. “Creemos que a Consellería de Política Territorial ten moita responsabilidade no proceso concursal desta empresa porque requiriron paralizar as obras cando en realidade eran coñecedores de que todo estaba correcto. Así o recoñecían os propios técnicos da Xunta nun informe previo ao devandito requirimento de paralización”.

Na opinión do grupo de Goberno local esta “persecución política” provocou prexuízos económicos e de inestabilidade tanto para o promotor coma para compradores; “o que motivou o atraso do pago desta débeda ao Concello”. Para os responsables cervenses, a actuación da Xunta, BNG, e PSOE “só provocou dúbidas e inseguridade xurídica” no peor dos momentos para o sector da construción. Segundo afirmaron, o proceder da Xunta só se baseou en criterios políticos, tentando darlle a Cervo o papel de “cabeza de turco” para ocultar así “os desvaríos urbanísticos de socialistas e nacionalistas en Foz e en Viveiro” aseguraron.