O PP promete unha nova gardería para Burela

NOTA DE PRENSA
O candidato número tres pola provincia de Lugo e deputado autonómico Jose Manuel Balseiro cualifica de tercermundista a situación na que se atopan as instalacións de Galescola burelense que aínda non foron arranxadas na súa totalidade despois despois dos estragos causados polo Klaus
O PPdeG COMPROMÉTESE A FACER UNHA NOVA GARDERÍA EN BURELA TENDO EN CONTA O MAL ESTADO DAS INSTALACIÓNS ACTUAIS E A ALTA DEMANDA EXISTENTE

* Balseiro Orol e González Barcia visitaron as instalacións e comprobaron in situ como improvisado arranxo da tellado, cuberto por unha lona, non evita a filtración de auga e frío polo tellado.

A Mariña, 19 de febreiro de 2009.- Cando está a piques de cumprirse un mes desde que o ciclón Klaus asolase gran parte dos concellos da nosa comarca as instalacións de Galescola de Burela seguen a resentirse dos efectos dos sucesivos temporais e do abandono por parte dos responsables do seu mantemento: o Concello e a Vicepresidencia da Xunta de Galicia. Así o puido comprobar o deputado autonómico do Partido Popular Jose Manuel Balseiro que visitou as instalacións acompañado de Jose María González Barcia, portavoz dos populares de Burela, e xunto a outros edís desta formación política na localidade. Todos puideron observar como o improvisado arranxo da cuberta non evita que se produzan filtracións de auga e frío polo tellado. “Incluso na zona de comedor hai dispostos cubos para recoller a auga que cae das goteiras, xusto ao lado mesmo das mesas onde comen os nenos e nenas”.

Observada a magnitude das deficiencias deste centro, Balseiro Orol cualificou a situación de “tercermundista” á vez que se comprometeu a que, o futuro Goberno de Galicia, de estar presidido por Alberto Núñez Feijóo construirá unha nova gardería en Burela coas instalacións de calidade e dotacións que require un centro destas características e coa capacidade suficiente para albergar a todos os nenos e nenas que así o precisen. “É vontade do Partido Popular destinar recursos e esforzos neste tipo de infraestruturas de benestar. Nós pensamos nas familias e, dun xeito especial, en facer máis fácil a conciliación da vida familiar e laboral. Hoxe acontece algo totalmente diferente: co BNG todos os recursos acaban por perderse en propaganda e hai moi poucos cartos para atallar os problemas das garderías galegas como esta tarde puidemos comprobar”

MÍNIMAS GARANTIAS DE SEGURIDADE?

Burela conta coa súa gardería por iniciativa do Goberno do Partido Popular pois esta formación política xestionaba tanto a Xunta como o Concello no momento da súa apertura. Ambas institucións colaboraron tamén na ampliación das actuais instalacións pero, tras o acceso do bipartito ao Goberno autonómico, os novos responsables nacionalistas puxeron innumerables trabas para autorizar a apertura das instalacións ampliadas alegando fallas de seguridade. Pola contra, hoxe, o departamento que dirixe Anxo Quintana permite sigan a empregarse unhas instalacións “nas que precisamente non se pode presumir da súa seguridade e condicións de habitabilidade e servizo mínimas” –conclúen desde o PP.

ESCRITO A VICEPRESIDENCIA

Balseiro Orol espera que a visita e a denuncia pública desta situación obrigue á Vicepresidencia da Xunta a adquirir o compromiso de amañar con carácter de urxencias estas deficiencias ou, polo menos, que os responsables deste departamento autonómico traballen en atopar unha fórmula axeitada para garantir que o servizo que se presta nestas instalacións cumpre as condicións mínimas de calidade. O candidato popular número tres pola provincia de Lugo, empregando a súa condición de deputado no Parlamento de Galicia, remitirá un escrito á Xunta no que deixará constancia destas deficiencias. Deste xeito o PP farase eco das queixas dos nais e pais que reclaman cheos de razón o arranxo urxente do tellado.

OÍDOS XORDOS ÁS QUEIXAS DAS NAIS E PAIS

Os populares aseguran que a lona que cobre a parte do tellado da gardería levan postas tres meses. Xa no seu momento esta cobertura tiña un carácter provisional. Hoxe as filtracións de auga e frío evidencian que os temporais deixaron a súa pegada no mesmo e, pese a iso, non existe intención de arranxar estes estragos coa urxencia debida. Tal e como explicaron ata o momento a Vicepresidencia da Xunta de Galicia fixo oídos xordos ás nais e pais dos nenos e nenas usuarios da gardería. Unha práctica moi habitual noutros moitos sitios nos que existen este tipo de problemas en instalacións xestionadas polo departamento de responsabilidade de Anxo Quintana.

González Barcia acusou ó bigoberno burelés, e concretamente a Nieves Cando, de pasotismo e deixación de funcións para esixir, como se merecen os nenos e nenas, o arranxo inmediato dunha instalación que máis ben parece unha carpa ca unha gardería. Igualmente, lembrou que o Bloque opúxose á financiación da ampliación da gardería, o que quere decir que non estaba a favor da mesma. Barcia lembrou que a inclusión da gardería na rede de galescolas propicia que a gardería custe ó ano 150.000’00€ ó concello de Burela, ademais do que pagan os usuários.