Deputación e Goberno de España poñen en marcha o pago de taxas por Internet o 3 de xaneiro

Nota de prensa:
Deputación e Goberno de España poñen en marcha o pago de taxas por Internet o 3 de xaneiro

– Besteiro e Portomeñe asinan o convenio de adhesión para o funcionamento dun sistema normalizado e seguro, que permitirá ós cidadáns aforrar cartos e tempo

– Os primeiros beneficiados serán os máis de 200 anunciantes cos que habitualmente traballa o Boletín Oficial da Provincia

– A posta en marcha do pago telemático coincide coa do Boletín Electrónico polo que as 1º taxas en aboarse dende a Rede serán as dos anuncios do xornal oficial

– Fronte á Xunta que garante a banda longa en 2013, a Deputación implantará este servizo nun prazo récord de 2 meses nas Casas Consistoriais e nos 48 telecentros dos 51 Concellos adheridos ó Innova-TE

O Presidente da Deputación, José Ramón Gómez Besteiro, e o Subdelegado do Goberno en Lugo, José Vázquez Portomeñe, asinaron este mércores o convenio de adhesión do organismo provincial á entidade dependente da Secretaría de Estado de Telecomunicacións: Red.es, para a posta en marcha, o vindeiro 3 de xaneiro, do pago telemático. É un sistema común, normalizado e seguro, que permitirá ós cidadáns pagar os seus tributos dende Internet con todas as garantías xurídicas, aforrándolles cartos e tempo ó non teren que desprazarse xa á Deputación. Os primeiros beneficiados serán os máis de 200 anunciantes cos que habitualmente traballa o Boletín Oficial da Provincia.

Gómez Besteiro subliñou que “seguimos dando pasos na administración electrónica. A primeira posta e marcha e, por tanto o pistoletazo de saída, do pago de taxas por Internet será cando comezará a funcionar o Boletín só en soporte electrónico. Deixamos de empregar o papel despois de moitos anos cunha forma renovada e moderna. O BOP vai a vivir unha relación cos veciños distinta pero igual de eficaz que durante estes centos de anos”.

A posta en marcha do pago telemático coincide coa do Boletín Electrónico da Provincia (E-BOP). A partires do vindeiro luns, a publicación máis antiga da provincia, que data no ano 1835 pasará do soporte papel ó dixital logrando máis de 500.000 consultas durante 2011 ó estar nun soporte accesible para calquera persoa que dispoña de ordenador e de conexión a Internet. Isto redundará, no incremento da participación cidadá e nunha maior transparencia na xestión das institucións. Mediante a dirección www.deputacionlugo.org, o E-BOP garante o acceso universal e gratuíto á publicación oficial que dá publicidade ás disposicións de carácter xeral e as ordenanzas, así como os actos, edictos, acordos, notificacións, anuncios e demais resolucións do conxunto das Administracións que operan na provincia.

Tanto o pago telemático como o E-BOP enmárcanse dentro do Innova-TE, o programa tecnolóxico máis ambicioso en Galicia en canto a prazos e investimentos se refire. Conta con 9 millóns de euros, -cofinanciados nun 70% con fondos da Unión Europea-, e garante a total implantación da administración electrónica na provincia en 2011.

1º taxas de pago telemático

O funcionamento do pago telemático e do E-BOP o 3 de xaneiro suporá que as primeiras taxas que se poderán aboar mediante a Rede sexan as dos anuncios que a partires de dita data se queiran publicar no xornal oficial. Para elo, os cidadáns só terán que dispoñer dun ordenador, conexión a Internet e estar en posesión do DNI electrónico. Os pasos a seguir para realizar este proceso son os seguintes: entrar no apartado Inserción de anuncios no BOP con pago telemático, onde aparecerá un icono específico para esta función. Pinchando neste apartado, o cidadán poderá escoller o modo de pago. A continuación, terá que cubrir os datos e dar a conformidade. Concluído o proceso, o usuario estará en condicións de poder descargar o xustificante de pago.

Malia que os prezos do BOP serán os primeiros que se poderán pagar co novo sistema, o pago telemático irase ampliando a outras taxas públicas. Deste xeito, facilitará o pago ós 62 Concellos que teñen delegado a recadación de tributos na Deputación, e outros prezos públicos como as taxas por dirección de obras ou pola utilización dos bens de dominio público provincial.

Banda longa en 2 meses

O Presidente tamén anunciou que a Deputación vén de adxudicar provisionalmente a Telefónica o concurso de banda longa nas Casas Consistoriais e nos 48 telecentros existentes nos 51 Concellos, que voluntariamente se adheriron ó Innova-TE. O organismo provincial dotará tamén ás sedes do INLUDES e do Servizo Provincial de Recadación dunha conexión a Internet de calidade nun tempo récord de 2 meses. Deste xeito, a empresa adxudicataria instalará unha interconexión de fibra óptica totalmente redundada, é dicir, que garante o seu funcionamento de xeito ininterrumpido, permitindo unha navegación segura pola Rede.

Con esta actuación, a Deputación segue a facer fronte á discriminación que sofre a provincia en materia de novas tecnoloxías. Cun 45,6%, Lugo é a provincia galega coa maior porcentaxe de habitantes sen acceso á banda longa. A Xunta, administración con competencias directas na materia, sitúa este servizo no horizonte de 2013 para o 86% dos veciños, quedando un 14% sen el e sen data para obtelo.

“Eu insisto en reivindicar da Xunta que tomen esta asunto como prioritario para poñer fin a este estado de diferenza que existe na provincia. De nada serve que os Concellos estén preparados para a banda longa se os veciños dende as súas casas non o poden facer. Sempre me gusta establecer as responsabilidades no campo de cada un. Aquí hai unha ineludible para o goberno autonómico, que instale no 100% da provincia a banda longa. Nós estamos facendo o noso traballo, nós xa estamos preparados, nós fixemos os deberes, polo que sería triste que a Xunta retrasase o proceso”, destacou Gómez Besteiro.

Deste xeito, en menos dun ano, co Innova-TE, o organismo provincial e os Concellos terán os medios necesarios para que os veciños realicen, sen custe algún, os seus trámites coa administración dende a Rede. Nembargantes, ata dentro de 2 anos, non contarán co servizo de banda longa necesario que debe habilitar a Xunta para realizalos dende a casa. O Pleno da Deputación aprobou xa no mes de xullo, aínda que coa abstención do Partido Popular, instar ó Executivo galego a que axilice ás accións necesarias para garantir a extensión da banda longa durante o 2011 ó 100% dos Concellos lugueses, xa que na actualidade existen 162.085 habitantes sen este servizo.

Pola súa banda, o Subdelegado do Goberno subliñou que “é un día importante no que se demostra que a suma multiplica e a resta divide. Este sistema permite igualar ós cidadáns e coloca a Lugo no mapa do sector das comunicacións”.

Banda longa de calidade

No mes de xaneiro, comezarán os traballos dotados de máis de 1 millón de euros. En marzo, a Deputación garantirá un servizo de Internet de 2 megas como mínimo, logrando que municipios e organismo provincial interactúen sen cortes, de maneira inmediata e segura, e permitindo ós veciños a máxima axilidade na realización dos 120 trámites que poderán realizar dende Internet co Innova-TE.