Arrincadeira de Riotorto promove unha homenaxe a Álvaro Cunqueiro polo centenario do seu nacemento

Nota de prensa

A.C.ARRINCADEIRA RIOTORTO Homenaxe ó escritor Álvaro Cunqueiro nas Terras de Miranda

A Asociación Cultural Arrincadeira promove á homenaxe ó escritor Álvaro Patricio Cunqueiro Mora co gallo da celebración do centenario do seu nacemento e que terá lugar o vindeiro sábado 9 de abril ás cinco da tarde a carón do paseo fluvial, ó seu paso polo lugar do Mazo de Riotorto. Será o primeiro acto que se celebre neste sendeiro fluvial que desde fai uns meses podemos disfrutar os veciños de Riotorto.
O acto consistirá na plantación dunha figueira, árbore que preside a casa do mago Merlín en Miranda e debaixo da que parola con moitos dos seus distinguidos visitantes. Xunto a figueira descubrirase unha placa conmemorativa.
Amais, nenos do colexio farán unha lectura colectiva dun dos capítulos do libro “Merlín e familia” e a nosa veciña Herminia de Carrao disertará sobre a figura de Alvaro Cunqueiro e a súa relación con Riotorto.
Ó día seguinte celebrase en Riotorto a V Feira da Artesanía do Ferro. Tendo en conta a especial relación de Cunqueiro co mundo dos ferreiros e máis concretamente cos de Riotorto haberá tamén un momento para que unha representación da Asociación para a promoción social dos ferreiros de Riotorto lean textos de Cunqueiro referidos ó seu oficio.

No centenario do seu nacemento Riotorto non pode quedar a marxe dos actos de celebración. A casa de Moirón, en Cachán, foi o berce da familia materna de Álvaro Cunqueiro Mora. O escritor mindoniense era fillo de Josefa Mor Moirón, e neto de Manuel Mor Bermúdez (de Espasande de Riba) e Carmen Moirón Agüera; o seu bisavó, Manuel Moirón, foi notario de Riotorto. Parece ser que o segundo apelido de Cunqueiro cambiáronllo por erro no servizo militar, pasando de “Mor” a “Mora”. Especial relación mantivo co seu tío-avó Serxio Moirón do cal decía que era “un gran comentador de sucesos”

Reivindicamos pois a especial significación de Riotorto na vida de Cunqueiro (especialmente na súa nenez) demostrada en numerosas refencias ao longo sa súa obra. Así, na primeira novela “Merlín e familia” aparecen múltiples mencións claramente riotortenses para situar á Miranda de Merlín. Incluso unha das personaxes da novela, Manueliña de Calros, está baseado nunha célebre muller veciña de Riotorto e amiga de Alvaro, que coñeceu nas súas estadías no noso pobo.
“Na casa dos meus abós en Riotorto ouvía as historias durante esas noites longas e puiden adequerir certas habelencias para contar” Alvaro Cunqueiro nunha entrevista feita por MichaeL Queyja para a revista Grial. I é que A Terra de Miranda Cunqueiriana son as Terras de Riotorto, e non outras.