O BNG de Barreiros informou os veciños sobre o gasoduto que mostraron o seu malestar pola desinformación do concello

Nota de prensa:
MALESTAR XERAL E DESCOÑECEMENTO ENTRE AS MÁIS DE OITENTA PERSOAS QUE ACUDIRON Á XUNTANZA INFORMATIVA SOBRE O GASODUTO CONVOCADA POLO BNG EN BARREIROS. OS VECIÑOS AMOSARON O SEU DESCONTENTO COA ACTUACIÓN DO GOBERNO MUNICIPAL E SORPRESA POLAS CONSECUENCIAS FAS AFECTACIÓNS DO TRAZADO.

Barreiros, 10 de agosto de 2011. Máis de 80 veciños participaron na xuntanza convocada polo BNG de Barreiros para faciltiar información sobre o trazado e as afectacións do gasoduto. O encontro desenvolvéuse nos vellos colexios de San Miguel.

Na xuntanza interviron Antonio Veiga, concelleiro do BNG en Barreiros, quen explicou cal fora a tramitación que se seguira ata este momento e asegurou que “o Concello de Barreiros ten coñecemento do proxecto desde primeiros de xullo e xa no Consello de Goberno da Xunta de 14 de abril se lle deu luz verde ao mesmo. Así que non veñan dicindo que o proxecto chegou a finais da semana pasada. Se os particulares tiñan coñecemento do mesmo, tamén o Concello tiña que telo. E se non o ten, denota que existe un problema grande no goberno municipal”.

Tamén interviu Ana Ermida, portavoz nacionalista nese Concello, quen informou sobre as distintas afectacións existentes e cales son as consecuencias das mesmas. A edil do BNG comentou que “o que máis sorprende é que, tal e como se plantexa desde a empresa que levará a cabo o proxecto, as servidumes de paso permanentes, que afectan a un ancho de tres metros ao redor da tubería que transcurra pola finca, non son obxecto de indemnización, xa que non se plantexa coma unha expropiación do dominio, senón simplemente como unha servidume”. Ermida dixo que “isto supón que os titulares das fincas afectadas terán unha serie de limitacións como a prohibición de labores de arada cunha profundidade de máis de 50 cms, a prohibición de construcción, de plantación de árbores ou arbustos altos, a obriga de deixar libre acceso ao persoal encargado do mantemento da instalación, etc… sen recibir ningún tipo de compensación, a priori, por parte da empresa executante”.

Diante desta información os titulares das fincas amosaron grande sorpresa e indignación pola falla de información que houbo ata este momento. Desde o BNG barreirense consideran, ademais, que “o alcalde volve a dar información incorrecta relativa a este asunto. Unha persoa que teña unha finca afectada polo trazado non vai poder seguir utilizándoa normalmente, xa que ten unha serie de limitacións e obrigas que lle impedirán realizar labores ou plantacións que ata este momento podía realizar. Eso é algo que entende calquera persoa e que, ademais, a empresa deixa moi claro cando explica os tipos de afectación no proxecto”.

En canto aos prazos os nacionalistas insisten en que “o prazo que se establece na publicación do BOE son 30 días a partir do 11 de xullo, día no que saiu publicado o proxecto. Na comunicación da que fala o alcalde nas súas declaracións a Consellería establece un prazo dun mes para as alegacións do Concello. Nese prazo o Concello pode alegar o que estime oportuno e, por suposto, o que o BNG solicita na moción presentada é que asuma como propias as alegacións das e dos particulares; pero, da notificación da Consellería non pode deducirse que se amplíe o prazo para alegar para os particulares. En calquera caso, o que está claro é que o prazo para presentar alegacións diante do Ministerio é o estipulado no Boletín Oficial do Estado”.

Recollida de sinaturas

Desde o BNG barreirensa engaden que “o que non serve é o consello de que hai tempo, porque xa se viu noutros procesos similares o que supón deixar pasar as cousas. Nós animamos ás afectadas e afectados a presentar alegacións a título individual e tamén iniciamos unha recollida de sinaturas entre a poboación en xeral para solicitar a modificación do trazado e a súa execución, na medida en que sexa técnicamente posible, por terreos de titularidade pública”. Afirman desde o BNG que “é fundamental que o malestar xeral que puidemos palpar na xuntanza de onte se transmita para que se teña constancia de que hai persoas moi afectadas con este trazado. O lóxico é que se aproveiten zonas de afectación de vías de comunicación, por exemplo, sempre que con isto se eviten prexuízos a particulares”.