Nota de prensa:
A XUNTA CONCRETA UNHA PARTIDA DE PRETO DE 100.000 EUROS PARA O MANTEMENTO DE SEIS ESCOLAS INFANTÍS E PUNTOS DE ATENCIÓN Á INFANCIA DEPENDENTES DE CONCELLOS DA MARIÑA
As achegas, concedidas pola Consellería de Traballo e Benestar, forman parte da colaboración para o mantemento destas dotacións xestionadas polos entes locais
Lugo, 3 de febreiro de 2012.- A Xunta de Galicia, a través da Consellería de Traballo e Benestar, achega unha partida económica de preto de 100.000 euros (94.727 euros) a seis escolas infantís de 0 a 3 anos e Puntos de Atención á Infancia (PAI) dependentes de outros tantos concellos da Mariña.
Estas axudas, cuxa comunicación ven de facerse pública logo da publicación no DOG, representan un importante apoio a mantemento destas dotacións que son xestionadas directamente polos distintos concellos e forma parte da habitual colaboración entre a Administración autonómica e os entes locais para o desenvolvemento de distintos servizos sociais.
No que respecta á comarca da Mariña, os centros beneficiados son: as escolas infantís de Barreiros, Viveiro e Xove e os Puntos de Atención Continuada que xestionan os consistorios de Cervo, Lourenzá e O Vicedo.
De xeito concreto, as dotacións distribúense da seguinte maneira: 26.078 euros, para o mantemento da escola infantil de Barreiros; 25.780 euros, para o centro de Viveiro; 12.187 euros, para a dotación do municipio de Xove, e senllas achegas de 10.227 euros para o caso dos centros dependentes dos consistorios de Cervo, Lourenzá e O Vicedo.
Esta actuación inscríbese na aposta da Xunta de Galicia polas prazas en escolas infantís de 0 a 3 anos. De feito, no que vai de lexislatura lévanse creado máis de 2.100 prazas públicas en toda a Comunidade Autónoma.