O concello de Burela dota cunha rampa de acceso o centro de saúde

A FINAIS DESTA SEMANA CONCLUIRÁN AS OBRAS DE CONSTRUCCIÓN DUNHA RAMPA DE ACCESO AO CENTRO DE SAÚDE DESDE A RÚA EIJO GARAY. NOS TRABALLOS, QUE REALIZA O CONCELLO, EMPRÉGASE TODO O MATERIAL QUE HABÍA NA ZONA.

Burela, 13 de xuño de 2012. En Burela comezaron as obras de construcción dunha rampa de acceso ao centro de saúde desde a rúa Eijo Garay. Os traballos son realizados polo Concello e nos mesmos estáse a empregar todo o material que en orixe había nesa zona da praza do Concello, “non se utiliza ningún tipo de material novo, as plaquetas que había nas escaleiras estánse a quitar para colocar despois nesta rampa e co pasamanos faremos o mesmo”, segundo explica o concelleiro de Obras, Manuel Fernández Valle.

O obxectivo desta rampa, que ten un ancho de 1,60 metros, “é mellorar a accesibilidade en toda esa zona. O centro de saúde rexistra a diario a visita de nais e pais con carritos dos seus bebés e tamén de persoas en cadeira de rodas ou con mobilidade reducida, de aí a importancia que ten a realización destes traballos. Ademáis deste xeito imos dando cumprimento pouco a pouco ao noso programa electoral”, sinalaron Fernández Valle e Diana Durán, concelleira de Servizos Sociais en Burela.

Os traballos de construcción da rampa de acceso ao centro de saúde concluirán a finais desta semana. Valle e Durán subliñan que terán un coste de cero euros. O equipo de goberno seguirá procedendo á eliminación doutras barreiras arquitectónicas na vila “para facerlles a vida máis fácil aos nosos veciños e veciñas”.