As Carboeiras de Sargadelos son escenario da exposición Nuevo Cuerpo que inclúe unhas 200 creacións
-Os autores son 14 artistas que forman parte do colectivo Galbana
Cervo, 28 de xullo de 2012-O Concello inaugurou esta tarde unha nova exposición nas Carboeiras de Sargadelos. Titúlase Nuevo Cuerpo, e está composta por unhas 200 pezas de 14 artistas que conforman o colectivo Galbana. Este grupo está integrado por persoas que estudaron Belas Artes na Universidade de Salamanca e que, no seu día, uníronse para realizar proxectos conxuntos, como é o caso desta mostra.
Trátase dun colectivo dinámico e aberto que busca a renovación constante. Un bo exemplo é esta mostra, que se exhibe por primeira vez e que, segundo os seus promotores, non volverá ser exposta da mesma maneira, coas mesmas obras nin baixo o mesmo nome en ningún outro lugar. Ao mesmo tempo, os seus membros comparten un mesmo obxectivo: achegar a arte actual ao maior número de persoas e facelo universal.
En canto á exposición, o nexo de unión é a temática, o corpo, xa sexa humano ou animal, pero tratado dende perspectivas moi diferentes e técnicas variadas. Deste xeito, o visitante poderá atopar fotografías dixitais, esculturas, cadros, acuarelas, instalacións ou matrices. As creacións están repartidas en tres salas atendendo ás diferentes formas de entender o mesmo concepto do corpo: unha sala con pezas máis formais, profundas e espirituais; outra que amosa unha visión máis frívola e unha última máis cotiá.
Na inauguración estivo presente o alcalde de Cervo, Alfonso Villares, a edil de Cultura, Begoña Alonso e varios compoñentes do colectivo Galbana. A delegada de Cultura asegurou compartir “la filosofía del colectivo Galbana en relación al arte y a la cultura en general, que deben ser accesibles a todas las personas y llegar al público”. Alonso anima a
cervenses e visitantes a “acercarse hasta este enclave fascinante como es el Conjunto Histórico Artístico de Sargadelos a contemplar esta exposición de tema único pero con múltiples miradas, rica en matices y en perspectivas que nos permite ver el cuerpo a través de los ojos de 14 artistas”. A mostra poderase visitar ata o 25 de agosto de martes a sábados en horario de 18:00 a 20:30 horas.