O alcalde de Burela asistirá á entrega das medallas aos axentes do Corpo Nacional de Policía que perderon a vida no Orzán

O ALCALDE ASISTIRÁ O 25 DE XULLO EN SANTIAGO Á ENTREGA DAS MEDALLAS DE OURO A TÍTULO PÓSTUMO AOS TRES AXENTES DA POLICÍA NACIONAL FALECIDOS NA TRAXEDIA DO ORZÁN. GONZÁLEZ BARCIA SUBLIÑA QUE RODRIGO MASEDA É UN EXEMPLO DE XENEROSIDADE, CAPAZ DE DAR A SÚA VIDA POLA DOS DEMÁIS.

Burela, 18 de xullo de 2012. O alcalde de Burela, José Mª González Barcia, asistirá o vindeiro 25 de xullo en Santiago á entrega das medallas de ouro a título póstumo aos tres axentes do Corpo Nacional de Policía que perderon a vida na traxedia do Orzán. Rodrigo Masada, natural de Burela, perdeu a vida xunto a dous compañeiros o pasado 27 de xaneiro cando tentaban salvar ao estudiante eslovaco Tomas Velicky.

O presidente da Xunta, Alberto Núñez Feijoo, destacou hai uns días que coa concesión da medalla de ouro o goberno galego quere recoñecer o sacrificio dos tres axentes falecidos na praia coruñesa do Orzán, así coma o traballo desenvolvido pola forzas e corpos de seguridade do Estado.

O rexedor dixo que “para toda a cidadanía de Burela é unha satisfacción que desde a Xunta se teñan acordado de concederlle a medalla de ouro da nosa comunidade autónoma a Rodrigo Maseda xunto cos seus compañeiros”.

González Barcia asistirá a ese acto “para amosar unha vez máis o apoio e o recoñecemento do Concello e do pobo de Burela a quen deu a vida polos demáis, a un veciño noso, un rapaz novo, que demostrou a súa vocación de servizo á cidadanía sen importarlle perder a súa vida para tentar salvar a doutras persoas. Rodrigo Maseda representa uns valores, que cada vez están a ser máis cuestionados”.

O alcalde engadiu que “nese acto estará representada Burela, o Concello e o conxunto da súa cidadanía. Alí estaremos porque consideramos que, como representantes de todos os veciños de Burela, debemos acompañar á familia de Rodrigo Maseda, aos seus pais e ao seu irmán. Este acto significa unha mostra de orgullo do que Rodrigo Maseda representa para todos nós. O que agardamos é que a figura deste xove burelés siga, como ata o de agora, sendo un referente para todos os cidadáns de Galicia, despois de que se lle entregue á súa familia a medalla de ouro de Galicia”.

Ao longo dos últimos meses foron varios os actos que se desenvolveron en homenaxe a Rodrigo Maseda e aos seus compañeiros do Corpo Nacional de Policía. O xoven burelés conta cunha lembranza especial na praia do Cantiño, á que acudía cando estaba en Burela na compaña dos seus amigos e familiares. González Barcia subliñou que “Rodrigo Maseda foi e é un exemplo de xenerosidade, algo que todos debemos ter moi presente”.

O acto de entrega das medallas de ouro de Galicia desenvolveráse o 25 de xullo ás 19:30 horas no Palacio de Congresos en Santiago de Compostela e estará presidido polo titular do executivo galego, Alberto Núñez Feijoo. Tamén recibirán este galardón o grupo Milladoiro e a Real Academia Gallega de Medicina y Cirugía.