O concelleiro de Mocidade de Ribadeo fixo unha valoración positiva das actividades de Sonda Norte

XAVIER CAMPOS FIXO UN BALANCE POSITIVO DAS ACTIVIDADES DE SONDA NORTE QUE SE DESENVOLVERON A PASADA FIN DE SEMANA. O EDIL DE MOCIDADE DIXO QUE ESTA PLATAFORMA PRETENDE SEGUIR DÁNDOLLE VALOR Á CREATIVIDADE DAS MOZAS E DOS MOZOS RIBADENSES.

Ribadeo, 9 de xullo de 2012. O concelleiro de Mocidade, Xavier Campos, fixo unha valoración positiva das actividades de Sonda Norte que se desenvolveron a pasada fin de semana e que congregaron a moito público tanto na Casa da Xuventude como na praia de As Illas.

Campos dixo que “vivimos unha fin de semana moi intensa dentro das actividades da plataforma Sonda Norte de Ribadeo. Comezamos o venres coa inauguración da primeira exposición de banda señada, cómic e ilustración, unha exposición colectiva que se inaugurou na Casa da Xuventude coa asistencia de máis de 100 persoas, que se congregaron alí para ver esta exposición na que participan 14 mozos e mozas de Ribadeo, vinculados á pintura, ao cómic, á ilustración”. Dita exposición estará aberta na Casa da Xuventude ata o vindeiro 3 de agosto.

O edil nacionalista contou que “tamén o sábado, e a pesares do clima un pouco adverso que tivemos, puidose celebrar con moito éxito, tanto de asistencia como pola calidade do espectáculo que se presentou, a proposta Ardora que misturaba música, poesía e danza a cargo Víctor Villar, María Justo e Martín Bucki, tres mozos ribadenses, vinculados á nosa vila e ao noso entorno. O resultado foi estupendo e buscaremos a maneira de que este espectáculo poida desenvolverse noutros puntos de Galicia, porque todo o mundo entendeu que é un espectáculo de moita calidade e que merecía a pena para que noutros lugares de Galicia puidesen disfrutalo”.

Ademáis o sábado Sonda Norte tivo unha xuntanza para preparar o traballo que fará desde agora ata o remate do ano. “Xa comezamos a planificar as seguintes exposicións e tamén as primeiras publicacións de Sonda Norte, que en breve poderemos presentar, especialmente un caderno poético e visual realizado só por rapazas de Ribadeo. Toda unha serie de actividades culturais coas que desde Sonda Norte pretendemos seguir dándolle valor á creatividade da mocidade ribadense. Entendemos que están contribuindo a axudar a dinamizar cultural e económicamente a nosa vila, o noso concello”, sinalou Xavier Campos.