A busca de emprego, principal inquietude dos 11.000 últimos usuarios do servizo de Atención ó Cidadán da Deputación

A busca de emprego, principal inquietude dos 11.000 últimos usuarios do Servizo de Atención ó Cidadán da Deputación

– A información sobre cursos, principalmente sobre o Pacto polo Emprego e as becas Leonardo ofrecidas polo organismo provincial, foi a máis demandada nos últimos 5 meses neste novo servizo creado polo Goberno provincial

– Esta unidade prestou atención a 10.001 persoas por vía telefónica, 30 por medio do correo electrónico e 1.068 de maneira presencial dende o pasado mes de marzo, sendo o 65% mulleres de entre 35 e 45 anos

A busca de emprego foi a principal inquietude das 11.100 persoas que se dirixiron ó Servizo de Atención ó Cidadán da Deputación nos últimos 5 meses. A maioría dos usuarios deste novo departamento, que creou este Goberno provincial, como fixo coa área de Cooperación e Asistencia ós Concellos, demandaron información sobre os cursos do Pacto Provincial polo Emprego, a través do que a institución luguesa, co financiamento nun 80% da Unión Europea, abre novas oportunidades laborais a 340 lucenses no paro formándoos nas profesións con máis futuro, e sobre as 70 becas Leonardo da Vinci para novos titulados que ofrece a Deputación. As bases reguladoras, a documentación a entregar, axuda para cumprimentar as solicitudes, o prezo e o contido das accións formativas, o publico ó que se dirixen ou a publicación da lista de admitidos foron as cuestións máis formuladas por parte das miles de persoas que se dirixiron a este departamento provincial.

As restantes consultas estiveron relacionadas coas seguintes áreas:

– Área de Deportes, Cultura, Turismo e Benestar Social: información sobre actividades e bolsas de emprego, así como de axudas relacionadas co benestar social.

– Área de Recursos Humanos e Formación: consultas sobre cursos de formación ou listaxes de contratación para persoal laboral e funcionarios.

– Área de Vías e Obras: axudas para obras de mellora dirixidas a asociacións ou profesionais do sector primario.

– Servizo de Relacións Institucionais: información para participar en Km0.

– Servizos Xerais: axuda a cumprimentar instancias.

– Servizos económicos financeiros: información sobre impostos tramitados polo departamento de Recadación.

– Servizo de novas tecnoloxías: información sobre cursos ou páxinas web dos Concellos.

– Servizo de contratación: información sobre avais.

– Servizo de urbanismo e arquitectura: información sobre ruídos.

A información, en números

A Unidade de Atención ó Cidadán atendeu entre marzo e xullo a 11.099 persoas por distintas vías: presencial, vía telefónica ou mediante correo electrónico. Dende este departamento deuse información dunha maneira presencial a 1.068 persoas, a 30 por medio de correo electrónico (principalmente ós Concellos da provincia sobre a actualización de asociacións) e a 10.001 por vía telefónica, tanto externa como interna. O 65% dos usuarios foron mulleres de entre 35 e 45 anos.

No mes de marzo atendéronse 159 persoas de xeito presencial e 2.487 por medio telefónico, mentres que en abril foron 147 os usuarios que acudiron ás oficinas a demandar información e 1.990 os que chamaron por teléfono. En maio, 146 persoas acercáronse ó Pazo de San Marcos, mentres que 2.272 optaron por chamar ó 982-26-00-00 e, en xuño, foron 375 cidadáns os que visitaron a sede do organismo provincial para solicitar algún tipo de información e 2.006 os que o fixeron a través dun teléfono. Por último, no mes de xullo pasaron 241 demandantes pola planta baixa de San Marcos e rexistráronse 1.246 chamadas telefónicas. A atención telemática, concentrou 5 solicitudes no mes de marzo, 15 entre abril e maio, e 10 entre xuño e xullo.

O mes que máis actividade total rexistrou foi marzo, 2.651 persoas, e o que menos xullo, con 1.492. En atención en oficina, xuño rexistrou o maior número de demandantes, con 375, e maio, tan só con 146. En canto á atención telefónica, marzo concentrou o maior número de interesados, uns 2.487, e xullo, o menor, con 1.245. En canto á vía telemática, todos os meses atendéronse unha media de 5 persoas.

Tres anos de andanza

A Deputación puxo en marcha hai tres anos o Servizo de Atención ó Cidadán, unha unidade que integra os servizos de información e atención, supoñendo a constitución dunha unidade especializada na función de informar sobre todas as actividades da Deputación, ó mesmo tempo que pode asumir tamén labores de control, seguimento e coordinación de trámites administrativos.

Co fin de mellorar a calidade da información e da optimización dos recursos, a oficina contempla os seguintes servizos: facilitar información sobre a provincia e sobre servizos e outros trámites administrativos, realizar xestións propias, facer atención presencial e telefónica e levar a cabo outros servizos como queixas, suxestións e xestión de avisos, etc.

Con este departamento inténtanse facilitar o acceso e a comprensión ós cidadáns, mobilizar os papeis en lugar de facer mover ó cidadán, potenciar a imaxe global do organismo provincial, intentar eliminar a cultura organizativa de “isto non é da miña competencia” e xerar, impulsar e potenciar a cultura organizativa do servizo ó cidadán.