O BNG de Barreiros di que o problema da depuradora de Reinante non é puntual, senón que reflicte a mala xestión

O BNG DE BARREIROS DI QUE O PROBLEMA DA DEPURADORA DE REINANTE NON É PUNTUAL, SENÓN QUE REFLICTE A MALA XESTIÓN DO GOBERNO MUNICIPAL. OS NACIONALISTAS PÍDENLLE AO ALCALDE QUE ASUMA A SÚA RESPONSABILIDADE E QUE RESPONDA DIANTE DAS VECIÑAS E DOS VECIÑOS A ONDE ESTIVO DESTINANDO O DIÑEIRO.

Barreiros, 7 de agosto de 2012. Desde o BNG de Barreiros amósanse sorprendidos polas declaracións do Alcalde barreirense, o popular Alfonso Fuente, cando “é capaz de asegurar que na praia de Reinante non hai vertidos e que a depuradora non ten ningún problema. Non sabemos se quen ten unha cortina diante dos ollos é Alfonso Fuente ou se ten algún problema nos sistemas olfactivo e visual ou é que nin sequera pasou pola zona, porque calquera que se achegue alí pode ver e notar a existencia deste vertido”.

Para a portavoz do BNG, Ana Ermida, “quen é un experto en cortinas de fume é Alfonso Fuente, que leva anos de nefasto goberno municipal, vendendo fume e cunha xestión que se resume perfectamente nas fotos que se poden ver hoxe nos medios de comunicación: servizos municipais desfasados, desbordados e máis caros para as veciñas e veciños de Barreiros”.

Os nacionalistas consideran que “ao goberno municipal barreirense non lle treme a man á hora de subir os impostos ás veciñas e veciños para tapar os furados da súa xestión municipal, mentras o abastecemento de auga ou o saneamento seguen desbordados. O Partido Popular leva anos defendendo un sistema de crecemento para Barreiros insostible e que ten estas consecuencias. É máis, nin sequera se molesta en explicarlle ás veciñas e aos veciños a onde vai o diñeiro dos seus impostos ou o diñeiro do famoso convenio da auga: uns cartos depositados polos promotores, nunha conta restrinxida, para a mellora do servizo de auga que non se utilizaron para este fin e dos que sí se utilizou, polo menos unha parte unha parte para outros fins que non sabemos, porque non nolo respondeu no último pleno”.