A nova ordenanza da zona ORA de Ribadeo entrou en vigor para permitir anular as sancións impostas no mesmo día

ENTROU EN VIGOR A MODIFICACIÓN DA ORDENANZA DA ZONA ORA, QUE PERMITIRÁ ANULAR AS SANCIÓNS IMPOSTAS NO MESMO DÍA AOS QUE SE EXCEDERAN NO TEMPO DE APARCAMENTO ADQUIRINDO UN TÍCKET POR 5 EUROS.

Ribadeo, 18 de xaneiro de 2013. Entrou en vigor a modificación da ordenanza da zona ORA, que permitirá anular as sancións impostas no mesmo día aos usuarios que se excederan no tempo de aparcamento adquirindo un tícket por importe de cinco euros. A modificación foi aprobada definitivamente.

O alcalde, Fernando Suárez, sinalou que “hai un tempo o pleno da Corporación acordou a modificación desta ordenanza de zona ORA que temos aquí, en Ribadeo, e que funciona realmente ben. Como todas as ordenanzas tamén ten un apartado sancionador para toda aquela xente que non cumprira, que non sacara o tícket ou que se excedera no tempo de uso”. O rexedor explicou que “o pleno decidiu facer unha modificación para que, como noutras cidades e vilas, aquelas persoas que sexan denunciadas porque se pasen do tempo que inicialmente asignaron poidan anular a sanción con unha multa moito máis reducida. É dicir, si pola ordenanza a multa son 24 euros estas persoas que durante ese día que foron denunciadas sacan un tícket que costa 5 euros e introducen o tícket inicial, a papeleta da denuncia e máis o tícket de ter abonado os 5 euros nun dispositivo que hai quedará dita denuncia anulada”.

Para Suárez Barcia “isto demostra que dende o Concello non temos interese ningún nin afán recadatorio e o que sí queremos é velar por un sector moi importante en Ribadeo, que son as actividades comerciais e de servizos, e que a xente que veña a Ribadeo e que por algún motivo se demore un pouquiño máis e que resulte denunciada por un exceso de tempo poida ter esa capacidade de anular a súa denuncia por unha cantidade mínima en relación coa denuncia ordinaria”.

O alcalde ribadense engadiu que “evidentemente si alguén tanto antes como agora, despois da modificación desta normativa, aparca na zona azul e non saca o tícket a sanción será igual que estaba prevista inicialmente, 24 euros e doce por pronto pago, pero en ningún caso con este mínimo de 5 euros”.