Daniel López proclámase campión da XIII Liga de Bolos de Xove Sub 16

Excelente participación nunha fría xornada da Liga de Bolos de Xove correspondente á tirada de Vilachá.

Liga Senior Masculina.- Clareáronse algo as cousas, pero non moito. A vitoria de Arturo Vigo, máis a mellor bolada, permítelle manter o liderato e ampliar a súa vantaxe a 7 puntos sobre José Rafael, 8 sobre Carlos Javier e xa 12 sobre Sócrates, este último o máis falloso na pasada xornada de Vilachá. Inda así, calquera dos 4 mantén as súas opcións á vitoria final, na cal, por suposto, vai contar moito a templanza dos xogadores; neste sentido, Arturo parte con vantaxe, dada a súa experiencia e o número de vitorias acadadas nas 24 edicións deste Campionato, razón pola cal neste intre é claramente favorito a renovar o título, que en caso de obtelo, sería o seu XIIIº.

Liga Senior Feminina.- Nesta Liga, definido xa o título a semana pasada, quedaba a pelexa pola segunda e terceira posición. Pois ben, a falla das tiradas de Morás (2 de marzo) e Sumoas (9 de marzo), Belén Meitín con 49 puntos asegura practicamente o subcampionato final, quedando a pelexa pola terceira praza restante entre Concepción Piñeiro con 40 puntos e Dolores Baño con 39, esta última grazas á vitoria obtida e mellor bolada esta pasada fin de semana en Vilachá.

Liga Sub 16.- Nesta Liga tamén está practicamente todo decidido. Daniel López proclamouse brillantemente CAMPIÓN DESTA XIIIª EDICIÓN DA LIGA SUB 16; os 16 puntos de vantaxe sobre a súa inmediata perseguidora son xa definitivos.
A pelexa que había entre Salomé Cardoso e seu irmán Isaías pola segunda praza, practicamente quedou resolta a favor da primeira, grazas á súa vitoria e mellor bolada, o que lle permite a Salomé manter unha diferenza de 9 puntos insalvable para Isaías.

A vindeira tirada, e DECIMOSÉTIMA DO CAMPIONATO, vai ter lugar no CENTRO SOCIAL DE MORÁS o vindeiro SÁBADO 2 DE MARZO, a partires das 15:00 horas (3 da tarde).