O PSOE de Lugo aporta en Santiago as primeiras ideas dos grupos de traballo para os debates en Madrid

As propostas dos militantes lucenses inscritos no grupo sobre Modelo de Europa serán compartidas esta tarde na sede do Pino, coa vista posta na convención sobre esta temática que o PSOE celebra en Madrid a semana que vén e á que acudirá o secretario xeral lucense, José Ramón Gómez Besteiro.

Os grupos de traballo dos militantes socialistas en Lugo xa dan froitos, e esta tarde representantes do partido na provincia levarán a Santiago as primeiras ideas sacadas das reunións da militancia que xurdiron despois do encontro Partido Aberto, Goberno Aberto do pasado 15 de decembro na facultade de Veterinaria, no que o secretario xeral, José Ramón Gómez Besteiro, trasladou esta proposta a petición dos participantes nesta cita. En concreto, os socialistas lucenses aportarán esta tarde as primeiras conclusións tiradas desde Lugo sobre o Modelo de Europa, na reunión de delegados de toda Galicia prevista sobre esta temática pola dirección do partido en Santiago, na rúa do Pino.

Os militantes lucenses inscritos neste grupo de debate mantiveron unha reunión onte á noite na sede do partido en Lugo e seguirán a traballar nos próximos días coa vista posta na Convención sobre o Modelo de Europa que o PSOE celebrará en Madrid a semana que vén, en concreto o 16 de febreiro, no marco dos actos previos á celebración da Conferencia Política do partido e á que acudirá José Ramón Gómez Besteiro. O secretario xeral lucense levará así ata Madrid as conclusións do traballo realizado pola militancia na provincia de Lugo. As seis temáticas diferentes dos grupos de traballo en Lugo foron adaptadas para poder confluír de forma coordinada co partido en Galicia e tamén nos cinco debates do PSOE a nivel federal, para poder trasladar do xeito máis eficaz as aportacións dos militantes e contribuír ao cambio e o debate de ideas no partido. As conclusións serán ademais recollidas nun documento final e compartidas coa cidadanía a través de reunións sectoriais na provincia.