O PSOE de Lugo porá en marcha a oficina parlamentaria itinerante o luns en Foz

Os representantes socialistas pola provincia nas diferentes Cámaras atenderán as demandas dos cidadáns da Mariña.

O PSdeG-PSOE de Lugo porá en marcha o luns día 11 ás 19.00 horas na sede do partido en Foz a oficina parlamentaria itinerante, coa fin de estar a disposición dos cidadáns para atender as súas demandas e poder transmitir dun xeito eficaz os problemas da zona nas diferentes cámaras de representación. Esta oficina parlamentaria itinerante contará sempre con algúns dos máximos representantes do PSdeG nos diferentes órganos e nace no marco das novas iniciativas que está a levar a cabo o PSOE en todo o Estado.

A iniciativa da oficina parlamentaria itinerante ten como obxectivo facilitar o acceso dos cidadáns da provincia aos representantes nestas cámaras, coa fin de acercar o máis posible as institucións aos veciños. Ten tamén a intención de coñecer máis de preto as denuncias, queixas ou demandas que os lucenses poidan ter respecto ao funcionamento dos gobernos, e trasladar cando sexa posible, a través de iniciativas e mocións parlamentarias, as inquietudes dos cidadáns.