O BNG de Burela lamenta que o alcalde non “mostre a súa solidariedade” cos veciñ@s afectad@s coas preferentes

Vén de consumarse a estafa das preferentes con quitas do 43% para os afectados de NGB, quitas que sen dúbida acadarán unha porcentaxe maior cando as persoas afectadas convertan as accións en líquido.

Lamentablemente, numerosos veciños e veciñas de Burela non son alleas a este problema que afecta a 62.000 galegos e galegas, como se puxo de manifesto no pleno municipal de xaneiro, no que o PP rexeitaba a proposta de moción presentada pola Plataforma de afectados polas participacións preferentes e subordinadas da Mariña. O PP de Burela rachaba así co consenso acadado na maioría dos concellos da Mariña, moitos deles gobernados polo propio PP.

O Sr. Barcia móstrase como un alumno avantaxado dos seus mestres Feijóo e Rajoy, e parece que vai a por nota. Non contento con rexeitar a proposta da Plataforma, o Sr. Alcalde presentou unha moción do seu propio partido como “proposta de alcaldía”, o que provocou a indignación entre as persoas afectadas que presenciaban o pleno.

Desde o grupo municipal do BNG defendemos a moción presentada pola Plataforma, como non podía ser doutro xeito, pois entendíamos que se debía continuar coa arbitraxe ao ritmo que se estaba a facer antes das eleccións galegas e que se debía asegurar a devolución líquida do 100% dos cartos investidos.

A medida que avanza a lexislatura e pleno tras pleno, ponse en evidencia de que lado está o PP de Burela. O goberno municipal, co Sr. Barcia á cabeza está a ser cómplice co roubo aos preferentistas, que verán como perden os aforros de toda unha vida. Unha vez máis constátase que o PP de Burela non goberna para os veciños e veciñas, senón que goberna seguindo o guión que lle marcan en Madrid e Santiago. O primeiro que debe facer o alcalde é escoitar e falar cos veciños e non darlles as costas como é norma desde que está á fronte do Concello.

Dous meses despois da celebración do mencionado pleno confírmanse os peores prognósticos e os veciños e veciñas afectadas verán como perden os seus aforros sen que o Goberno Municipal lles dese o seu apoio. O BNG de Burela lamenta profundamente que o Sr. Alcalde non teña dado a cara e quere mostrar a súa solidariedade e trasladar o seu apoio a todos os veciños e veciñas afectadas por esta estafa bancaria. Hoxe mesmo, o BNG, a través do grupo parlamentar no Parlamento Galego, solicitaba a comparecencia do presidente da Xunta, solicitude que foi rexeitada polo Partido Popular, facendo uso (e abuso) da súa maioría na cámara. Está claro cal é a forma que temos de facer política uns e outros. Desde logo temos claro que no BNG continuaremos a traballar polo interese xeral dos veciños e veciñas de Burela.

Consello Local do BNG-Burela