Os socialistas da Mariña reuníronse no Hospital da Costa para denunciar o “engano” do PP coa área sanitaria

Os representantes do PSdeG-PSOE na comarca reclaman que a Xunta manteña “unha área sanitaria autónoma e con orzamento independente” e deixe de “sembrar a confusión entre os veciños”.

Os socialistas critican que Feijóo queira manter “o engano” coa “cortina de fume” da ampliación do Hospital de Burela, e lembran que o PSdeG presentou en xaneiro unha emenda aos Orzamentos para meter unha partida de 2 millóns de euros para a ampliación do hospital que foi rexeitada

Os representantes do PSdeG-PSOE dos concellos e da comarca da Mariña reuníronse esta mañá diante do Hospital de Burela para denunciar o “engano” da Xunta coa eliminación da área sanitaria. “Queremos que manteñan unha área sanitaria autónoma e cun orzamento independente e que confirmen se isto vai ser así; todo o demáis son xogos de palabras e un intento de sembrar a confusión entre os veciños”, critica o coordinador comarcal e deputado autonómico, José Ramón Val.

O socialista lamenta que o PP pretenda agora poñer “unha cortina de fume” coa suposta ampliación do Hospital de Burela “e que crean que con esa maniobra a xente vai esquecer o que hai detrás de todo isto, que non é nin máis nin menos que a eliminación da área e que pase a depender de Lugo, cos graves trastornos que isto suporá para os veciños, e que abre a porta á eliminación de servizos e á privatización progresiva da sanidade”.

Val destaca que onte “primeiro Feijóo no Consello da Xunta, e despois os deputados do PP cunha rolda de prensa, trataron de anunciar ao grande a ampliación do hospital, cando o único que están a licitar é o inicio da redacción dun documento de ampliación que, por certo, xa estaba en marcha co bipartito e eles pararon, polo que están a tirar todo o traballo anterior e a prolongar un proxecto no que non fixeron nada en catro anos”, explica. “Agora que ven a mobilización cidadá e de golpe lémbranse desta promesa, pero a única realidade é que nos orzamentos do Goberno galego para este ano só hai dúas partidas de 50.000 e 36.800 euros que non chegan nin para empezar”, destaca.

Emenda dos socialistas aos orzamentos de 2 millóns de euros

José Ramón Val recorda, asimesmo, que o PSdeG presentou en xaneiro unha emenda aos Orzamentos da Xunta para dotar o Hospital de Burela dunha partida de 2.000.000 de euros, que foi rexeitada polo PP. “Agora que non veñan facéndonos crer que apostan pola ampliación, porque a xente xa está farta de promesas incumpridas, de tomaduras de pelo e da irresponsabilidade deste Goberno”, censura o socialista. Hoxe mesmo, o PSdeG defende unha proposición non de lei no Parlamento para o mantemento das áreas sanitarias de Burela e Monforte.