O PP de Viveiro solicita do Goberno local que cumpra os acordos plenarios e de solución ás embarcacións Segunda Flor de Ares e A Pomba

No ano 2001 o goberno local do PP de Viveiro, tomou a decisión de salvar do despece ao pesqueiro artesanal Segunda Flor de Ares para convertelo en monumento, previa reparación de desperfectos e pintura, para ubicalo no parque situado fronte á piscina, hoxe coñecido como Parque de D. Francisco Sampedro Galdo.

O goberno bipartito PSOE-BNG no ano 2005 adquiriu a embarcación A Pomba para facer dela unha aula divulgativa de pesca, que nunca chegou a cristalizar nin houbo intentos para a súa creación. No pleno do 30 de decembro do ano 2010 todos os grupos municipais acordaron o despece do Segunda Flor de Ares e colocar no seu lugar no Parque D. Francisco Sampedro Galdo a embarcación A Pomba.

E no Pleno do 31 de maio do ano 2012, o grupo municipal do PP de Viveiro dentro do apartado de Rogos e Preguntas dirixiuse ao Alcalde sobre a situación destas embarcacións, indicando este que a reparación de A Pomba se fará en terra cando se teña capacidade económica para realizar ditos traballos. Mentres, sobre a embarcación Segunda Flor de Ares o Alcalde da conta que a intención é reparalo, xa que o despece superaría os 5.000 euros ademais do seu traslado a un vertedoiro de Pontevedra.

O PP de Viveiro faise eco dos veciños, no solo de Celeiro, da situación deplorable na que se atopa a embarcación Segunda Flor de Ares desde fai máis de dous anos, o que nos obriga unha vez máis a solicitar publicamente ao Alcalde e ao Delegado de Obras que adopten una decisión para evitar a vergoña pública de ter dita embarcación no parque D. Francisco Sampedro Galdo, cuxa iniciativa inicial, se converteu nun claro símbolo de deixadez e abandono, a imaxe e semellanza do goberno municipal.

Da embarcación A Pomba, o Alcalde recoñece nun medio de comunicación en outubro do 2011 non saber xestionar a súa adquisición para convertelo en Barco-Museo. Non é difícil adiviñar o final desta embarcación, o seu despece ou o seu afundimento, mentres tanto o rexedor se mantén empecinado en manter amarrada a porto a embarcación cun gasto anual mínimo para as arcas do Concello de 4.787,56 euros, ademais do conseguinte risco de que ocorra unha desgraza, pois non é a primeira vez que se soltaron amarras quedando A Pomba á deriva e tendo que ser rescatada por mariñeiros de Celeiro. Por outro lado, dende o PP de Viveiro descoñecemos se dita embarcación está cuberta con algún tipo de seguro que cubra as posibles continxencias en caso de producirse unha máis que probable incidencia, dada a nula vixilancia e inexistente mantemento da mencionada embarcación.

O PP de Viveiro pode afirmar que a día de hoxe o goberno local socialista non cumpriu con ningún dos acordos ou promesas como acostuma ser habitual, e moito menos no prazo de dous meses, prazo que o propio alcalde se dera para buscar unha solución. Polo que unha vez máis esiximos ao goberno local socialista que solucione dunha vez por todas a situación das embarcacións Segunda Flor de Ares e A Pomba e non espere a que ocorra unha desgraza para executar algo que debería estar resolto fai anos.