O BNG denunciará a estafa das preferentes no acto central da campaña “Non é unha crise, é un roubo!”

Ermida anima ás mariñás e aos mariñaos a rebelarse contra a situación de desemprego e desmantelamento de servizos públicos provocada pola política dos populares

A Mariña, 23 de maio de 2013. Os actos da campaña “Non é unha crise, é un roubo!”, iniciada polo BNG para denunciar o continuo espolio ao que as diferentes medidas levadas a cabo tanto polo goberno central como polo galego están sometendo á cidadanía, continúa na Mariña. Neste caso, unha delegación do Bloque Nacionalista Galego na Mariña, encabezada por Ana Ermida, responsábel comarcal da formación, e Bernardo Fraga, portavoz municipal en Viveiro, informaron á cidadanía de Viveiro da situación que se está a vivir actualmente “e que dende os gobernos Central e Galego queren que vexamos coma unha crise, pero non é máis que un ataque aos dereitos da cidadanía”, explicou Ermida.

Coa posta en marcha desta campaña, dende as filas do Bloque pretenden denunciar as prerrogativas e os beneficios que reciben a banca e o grande capital, fronte ás inxustizas e o roubo que sofre a maioría social, a xente do común. Neste senso Ana Ermida “anima a todas as persoas a rebelarse contra esta situación de desemprego, de desmantelamento de servizos públicos e de suba de impostos que só beneficia aos poderes financeiros”.

“Temos que ser nos mesmos os que respondamos ante os continuos ataques que estamos a sufrir por parte dos gobernos do Estado e da Xunta de Galiza. É fundamental que o pobo se organice e haxa unha resposta multitudinaria dos homes e mulleres do noso país para defender os nosos propios intereses: somos máis e temos que xuntarnos, unirnos e rebelarnos contra esta situación para lograr un cambio real das políticas que se están a levar a cabo”, concluíu Ermida.

Asemade, este reparto informativo serviu tamén para anunciar o acto central da campaña “Non é unha crise, é un roubo!” na Mariña, que terá lugar este sábado, 25 de maio, as 20:30 horas, na praza da Fontenova, en Viveiro, e na que participarán ademais de Ana Ermida e Bernardo Fraga, Xavier Vence, portavoz nacional do BNG, Xulio Vicente, portavoz de afectados polas preferentes, así como persoas afectadas por este produto financeiro.