O equipo de goberno de Burela critica a continua indefinición da Deputación coas certificacións ISO 14001

Burela, 25 de maio de 2013. O equipo de goberno de Burela critica a continua indefinición da Deputación de Lugo coas certificacións ISO 14001 para as praias luguesas. Os populares din que se elles esixen medidas adicionais aos Concellos que custan cartos, algo que non ocorre coa bandeira azul. Desde o equipo de goberno sinalan que “a Deputación Provincial cando puxo en marcha este invento non aclarou se nos anos sucesivos ía seguir correndo cos gastos das certificacións ISO 14001 para as praias do noso concello. Non é culpa nosa esta situación de permanente dúbida. Se a Deputación aclarara a súa intención nun primeiro momento probablemente nosoutros seguiríamos traballando nesa liña”.

Os populares subliñan que “tan mal non o debemos estar facendo porque renovamos as bandeiras azuis nas dúas praias, os dous galardóns e tivemos un máis temático. Dende logo eles non o fixeron mellor nunca e iso que se atoparon coa herdanza que lles deixamos nosoutros”.

O equipo de goberno indica que “a bandeira azul non nos costa nada porque contamos coa infraestrutura que temos nas praias herdada do goberno anterior do Partido Popular, porque o bipartito nas praias non fixo nada salvo poñer unha ducha. Pensamos que se nos sae gratis debemos seguir apostando pola bandeira azul”.
Sobre a certificación ISO 14001 o grupo de goberno di que “aínda que os trámites auditores os pague a Deputación de Lugo o que si é certo é que lle esixen unhas medidas adicionais ao Concello que custan diñeiro. Aparte diso está a sensación de indefinición permanente que ten a Deputación, que non di nunca se para o ano seguinte vai seguir pagando as auditorías correspondentes. Polo tanto que non nos veñan con milongas e disculpas”.

Desde o equipo de goberno rexeitan as críticas realizadas desde o PSOE nas que dicían que o turismo está abandonado en Burela, “iso non é certo e como mostra dous botóns: a promoción que fixemos de Expomar, presentando a feira en varios lugares para que a xente viñera e os hoteis de Burela estiveron cheos este fin de semana e o pobo estivo de bote en bote, o que quere dicir algo; e eles que se riron cando dixemos que o peixe de Burela ía estar na volta ciclista a España no seu día, hai un ano, pois aí está. Agora falan de turismo porque non teñen outra cousa de que falar. Se arranxaran primeiro as súas cuestións internas probablemente despois terían as cousas máis claras”.