Antonio Veiga participou na presentación do Maratón de Fútbol 8 Feminino “O Folgueiro”

O torneo celebrarase os vindeiros días 29 e 30 de xuño, no Campo Boavista de O Vicedo

O Vicedo, 8 de xuño de 2013. O vicepresidente da Deputación de Lugo e responsábel das áreas de Benestar Social e Deporte, o nacionalista Antonio Veiga, participou, esta mañá, na presentación do Maratón de Fútbol 8 Feminino “O Folgueiro”, que organiza o club feminino do mismo nome, en colaboración co ente provincial, e que se vai disputar os días 29 e 30 de xuño, no Campo Boavista de O Vicedo.

O principal obxectivo que se persegue co desenvolvemento desta proba, organizada polo club deportivo O Folgueiro feminino, en colaboración co organismo provincial, é iniciar na comarca o interese polo fútbol feminino, que xa está máis estendido noutras zonas de Galiza. Neste sentido, Antonio Veiga apuntou que “desde a área de Deporte da Deputación apostamos polo deporte en feminino, sexa cal sexa a disciplina deportiva, pero máis aínda no caso do fútbol, xa que é nun dos deportes nos que precisa unha maior promoción, e proba desa aposta é a Copa Deputación de Fútbol, que dende fai cinco anos inclúe a categoría feminina”.

“O deporte – continuou Veiga – é sinónimo de educar en valores, polo que debe fomentar a igualdade na súa práctica, especialmente se se trata do fútbol que, polo seu grande número de afeccionados, xoga un papel fundamental na loita contra problemas sociais como é o caso das desigualdades de xénero”.

O maratón organízase en dous torneos paralelos, o torneo B dirixido a mulleres que nunca disputaron ningunha competición federada ou levan tempo sin facelo, pensado principalmente para conxuntos da comarca, e o torneo A, para equipos federados procedentes de Galiza, Asturias de León. A este respecto, Veiga precisou que “a presenza de futbolistas profesionais nesta proba permite crear referentes próximos na Mariña para incorporar novas xogadoras”.

Así mesmo, desde a organización auguran a presenza dunhas 1.000 persoas entre xogadoras, técnicos e delegados, algo que segundo explicou o vicepresidente da Deputación “terá unha grande repercusión no plano turístico e económico tanto para O Vicedo como para a comarca”.