A Comisión Veciñal na defensa dos Servizos Sanitarios en Cervo aclara que o comunicado lido pola orquestra nas festas de Lieiro foi unha iniciativa súa

CERVO, 11 DE XULLO. Vista a polémica xurdida na pasada fin de semana a Comisión Veciñal na defensa dos Servizos Sanitarios de Cervo quere manifestar que “a lectura que se fixo por parte da orquestra foi unha iniciativa propia desta comisión, non tendo nada que ver a comisión organizadora das festas de Lieiro nin tendo coñecemento do mesma ata a súa lectura.

Calquera veciño, colectivo ou asociación pode achegarse ata o palco e facerlle entrega a orquestra calquera comunicado para a súa lectura, sen que a comisión organizadora das festas teña que ter coñecemento da mesma e sen ser responsables do que se diga por parte da orquestra.

A comisión esta a traballar tódolos días no seu obxectivo para manter as catro prazas de facultativos no Concello de Cervo e non entende nin de fins de semana nin de festivos, non como algún persoeiro con responsabilidades de goberno que parece que cando esta a tomar algo non lle gusta que lle falen de reivindicacións sanitarias, por moi xustas que estas sexan.

Dende a Comisión Veciñal entenden que “o comunicado que se leu na pasada fin de semana non atenta contra ninguén, non obriga a ninguén e non debería molestar a ninguén, a non ser que se sintan responsables por non estar a facer todo o que esta nas súas mans para manter os catro facultativos no Concello de Cervo.

A comisión anuncia que seguirá traballando na mellora dos servizos sanitarios en Cervo “con quen queira acompañala” e consideran que unha recollida de sinaturas “nin é radical nin é a politización de nada”, “é o soporte dunha demanda social para non perder o que tiñamos e reclamamos por xustiza”. Resulta difícil de entender que quen di defender o mesmo que nos coa boca pequena, faga o contrario coa boca grande.