A Deputación confirma que romperá as relacións con NBG se non devolve os aforros aos preferentistas

Lugo, 10 de xullo de 2013. Na mañá deste mércores 10 de xullo, a Deputación de Lugo acolleu unha rolda de prensa conxunta dos portavoces dos tres grupos políticos con representación na institución, máis os representantes da Plataforma de Afectados Polas Preferentes e Subordinadas de Lugo, Xavier Novo e Digna Lagarón.

Nesta rolda de prensa, convocada para manifestar o apoio da institución aos estafados polas preferentes, Mario Outeiro afirmou que “o BNG leva desde que estalou o conflito, en 2011, situado da banda dos estafados, propoñendo iniciativas na súa defensa e a devolución íntegra dos seus aforros. Desta maneira foi a primeira forza política en propoñer alternativas na defensa dos intereses nas institucións, tanto en concellos como no Parlamento Galego, no Estado coma no Parlamento Europeo”.

Mario Outeiro, portavoz do BNG na Deputación de Lugo, ratificou a postura acordada no pasado pleno da Deputación de Lugo no que se aprobou por unanimidade a proposta de acordo de goberno para requirir a Novagalicia Banco que inicie a devolución íntegra dos aforros dos afectados e afectadas polas participacións preferentes e obrigacións subordinadas. De non producirse este reintegro a Deputación procederá a cancelar os acordos vixentes coa entidade, tendo en conta a aplicación de criterios obxectivos e a preservación dos intereses da provincia.

Mario Outeiro lamentou o feche da vía da arbitraxe, conseguida grazas ao traballo e mobilización das plataformas de afectados, “cando aínda hai en Lugo arredor de 4.000 persoas (dos 8.000 afectados) que non puideron aínda recuperar o seu diñeiro por esa vía. De feito, a nosa portavoz no Parlamento Europeo, Ana Miranda, vén de solicitarlle ao señor Almunia, facendo chegarlle a demanda da Coordinadora de Plataformas de Afectados polas Preferentes e Subordinadas de Galiza, que clarifique de xeito urxente o motivo polo que non se pode seguir efectuando a arbitraxe, e instouno a unha xuntanza urxente con afectados para clarificar a situación e que o proceso de arbitraxe siga aberto”.

O portavoz do BNG na Deputación de Lugo lembrou que “desde o BNG sempre reclamamos a derogación do Real Decreto do 21 de marzo de 2013 polo que Novagalicia Banco terá que canxear as participacións preferentes e as obrigacións subordinadas e aplicar unha quita importante aos aforros de miles de familias, como tamén nos mostramos contrarios á resolución do FROB do 7 de xuño onde se dan a coñecer as porcentaxes de quita das Preferentes e Subordinadas con e sen vencemento de Novagalicia Banco. Desde a nosa posición, o BNG segue a reclamar que a solución a esta problemática pasa por unha decisión política, xa que é o FROB actualmente o dono de Novagalicia Banco, co que a última palabra téñena o Ministerio de Economía e o propio FROB”.