O alcalde de Ribadeo emite un bando na véspera do 25 de xullo, Día da Patria Galega

Fernando Suárez Barcia, alcalde de Ribadeo, emitiu este mércores un bando no que fai saber aos veciños e veciñas que “estamos a piques de celebrar un ano máis o 25 de xullo, o Día da Patria Galega, data na que nos recoñecemos todos e todas como pobo, coa nosa identidade e historia, coa nosa língua, baixo a nosa bandeira. Son símbolos que
nos dan forza colectiva e que hoxe deben ser tamén o alicerce da resistencia cívica ao desmantelamento de todo o sistema de estado do benestar. Un Día da Patria hoxe presidido pola preocupación cidadá pola situación económica do país.

Por vez primeira na historia democrática estamos no risco de deixar a unha nova xeración nun marco económico, laboral e social peor de como nolo deixaron as xeracións anteriores, baixo a excusa da crise existente. “Crise”. Palabra que define eufemisticamente a estafa profunda protagonizada polos mercados, banca e sectores financeiros que se invocan para desfacer un sistema de conquistas sociais e de loitas seculares por dereitos que hoxe vemos a piques de desaparecer baixo unha tesoira inmisericorde que carga sobre asalariados, traballadores autónomos, funcionariado, desempregados/as, dependentes, pensionistas, servizos públicos, mulleres, maiores,
crianzas… Todos e todas pagan, agás quen orixinaron a crise.

En segundo lugar, non so se pretende desmantelar a sociedade do benestar, senón que tamén vemos como se albiscan recortes de competencias da Xunta de Galicia e dos concellos para, reforzando o papel das Deputacións Provinciais, enfatizar e recentralizar así un estado centralista, de concepción radial e unitaria, nun retorno
ao pasado máis caduco, escuro, centralista e caciquil. Non se actúa sobre as causas que provocan a asfixia no financiamento dos concellos, nin tampouco se garanten os fondos para atender as crecentes necesidades básicas que as veciñas e os veciños
demandan, pois somos a administración máis cercana á xente. Aproveitase a crise para querer reconducir pola porta de atrás o estado descentralizado das comunidades autónomas e dos municipios.

Non se recuperan os impostos de patrimonio para os que máis teñen, nembargantes súbense impostos directos e indirectos a eíto para as clases traballadoras.

Reclámaselles con nocturnidade e aleivosía aos vellos emigrantes de Europa e América por non declarar unhas pensións que nun principio non era obrigatorio facelo. Agora, tras cambiaren de criterio cun exclusivo afán recaudatorio, os nosos emigrantes son tratados e perseguidos como evasores. Pola contra, amnistíanse fiscalmente aos Bárcenas e compañía que roubaron a mancheas e cuxa fortuna non provén do traballo senón do roubo, da especulación e do suborno.

Mirouse cara a outro lado mentres que algunhas persoas levaban á creba as nosas caixas de aforros e mentres que milleiros de familias eran engañadas, cando non roubadas literalmente, e agora envíanse notificacións de sancións administrativas (multas puras e duras) a aqueles que se atreveron a reclamar na rúa o que lies roubaron.

Por iso, debemos tamén desde os Concellos, ser altofalantes de denuncia destas falcatruadas; e tamén queremos, desde abaixo construir país. Porque poñemos en práctica na medida das nosas posibilidades aquilo polo que loitamos e eremos. Por iso lle damos moita importancia ao gasto social, máis aló da falla de atención
manifesta do Estado e da Xunta.

Porque cremos nunha vila e nun concello urbanísticamente ordenado,
traballamos e dialogamos coas mans abertas, con luz e taquígrafos e case que podemos dicir hoxe que o PXOM é xa unha realidade.
Porque cremos nun dos desexos máis importantes da cidadanía, e que botou hai pouco máis de un ano a máis de un milleiro de vecinos e vecinas á rúa en manifestación a prol dunha nova residencia de maiores en Ribadeo e estamos a dar pasos definitivos con todas as administracións, pero liderando nos desde o Concello, para tentar converter moi axiña un desexo en realidade.

En definitiva, porque vemos o mundo dun determinado xeito e porque o
queremos por en práctica e demostrar que as políticas da dignidade tamén se demostran andando.

Queremos veciños e veciñas que neste vindeiro Día da Patria que as bandeiras galegas que se penduren nos balcóns de Ribadeo sexan a expresión desa reivindicación dun futuro mellor para a nosa térra e de defensa dun benestar que custou moito erguer para que hoxe, desde a lonxanía e comodidade dos salóns da banca, das bolsas e dos mercados non nolo rouben”.