O goberno do Valadouro pedirá información á Xunta pola supresión dunha monitora da escola infantil sen informar ao Concello

O goberno municipal do Valadouro vén de rexistrar un requerimento de información dirixido ao Consorcio Galego de Servizos de Igualdade e Benestar do goberno autonómico no que esixen que expliquen a intención de privar á escola infantil do municipio dunha monitora encargada de atender os nenos de 0 a 2 anos para destinala ao centro de Alfoz. Unha decisión “tomada de xeito unilateral e sen informar ao Concello, como acostuma a facer o PP”, a pesar de que son as arcas locais as que asumen os custos de mantemento, limpeza, vixianza e seguridade e de que o Concello forma parte do convenio asinado coa Xunta, e que asumiu incluso os custos de ampliación da escola en 2010.

O alcalde do Valadouro, Edmundo Maseda, censura o “novo ataque do goberno autonómico aos servizos públicos” e a “nova política do PP de desvestir un santo para vestir outro e sempre en favor dos seus intereses particulares e en detrimento dos veciños, que se está a ver tamén noutras actuacións relacionadas coa educación ou a sanidade na Mariña”. Por todo isto, os gobernantes do Valadouro solicitan explicacións sobre os motivos desta supresión sen ningú tipo de información ao Concello e esixen “que se convoque con carácter urxente a Comisión Mixta de seguimento do Convenio a fin de analizar o impacto e a incidencia que poidese ter dita decisión na calidade do proxecto pedagóxico do Centro así como no seu caso analizar posibles alternativas”, xa que, denuncian, o Concello pediu en xuño de 2011 que se reunise dita Comisión sen obter resposta.

Afectará a outros concellos
O goberno do Valadouro advirte de que esta decisión de suprimir monitoras para dotar a escola infantil da Xunta en Alfoz, “afectará tamén a outros concellos como Foz”, segundo a información á que tiveron acceso. “A Xunta renuncia á dotación e creación de servizos públicos e segue coa súa teima da austeridade por riba de todo”, critican.