Raquel Arias acusa a Besteiro de usar os GES para a súa campaña política en contra dos intereses dos veciños

Lugo, 9 de xullo de 2013.- A delegada territorial, Raquel Arias, defendeu a transparencia dos procesos de selección de persoal para emerxencias que iniciaron algúns concellos da provincia. “É rotundamente falso que a Xunta e a Deputación de Lugo acordaran paralizar o proceso de selección de persoal dos grupo de emerxencias supramunicipal” (GES), afirmou.

A delegada entende que a Deputación “o único que quere é enredar”. Explica que o proceso de selección de persoal para os GES é responsabilidade dos concellos, “por suposto dende a Xunta de Galicia non imos tolerar ningunha irregularidade, pero o que tampouco imos facer é facerlle a campaña ao señor Besteiro”.

Arias afirma que a Comisión de Seguimento dos GES, da que forman parte Xunta, Deputacións e Fegamp. reuniuse onte a petición da Deputación para estudar supostas incidencias na posta en marcha de tres grupos e, “por abrumadora maioría dos seus membros, 15 dos 16 que a integran, estimou que o procedemento que seguen os concellos de Quiroga e Guitiriz é correcto”.

Pola súa banda, sinalou Arias, “tal e como se viu, o concello de Folgoso do Courel non está seleccionando persoal para o GES, senón para dispoñer dun equipo de emerxencias do propìo concello”. Este equipo, engadiu, funcionará en tanto non se poñan en marcha os GES, momento en que, segundo acordou onte a comisión, “estudarase se é posible a integración dese grupo no novo GES ou se, polo contrario, contravén o convenio”.

A delegada lamenta “a actitude da Deputación de Lugo, que unha vez máis antepón intereses partidistas aos intereses e necesidades dos cidadáns porque actúa só con dos obxectivos: a promoción e autobombo do seu presidente e a politización de toda a súa xestión, aínda que iso supoña deixar aos veciños sen atención de emerxencias ou mesmo sen servizos sociais”.

Arias lembra que a creación dos GES foi acordada pola Xunta, as Deputacións e a Fegamp, “pero, como vén sendo habitual, avanzado xa o proceso a Deputaciónde Lugo tenta boicotealo e poñer paus nas rodas”

Raquel Arias entende que as recentes declaracións de deputados socialistas sobre os GES buscan “confundir á cidadanía e sementar dúbidas sobre un proxecto que por primeira vez instaura unha cobertura completa e racional das emerxencias na provincia e profesionaliza aos equipos que desenvolven estas funcións nos concellos”.