Sanidade ampliará as prazas de atención ás persoas con trastorno mental grave e persistente

O Consello de Xunta reunido este xoves 4 de xullo aprobou un acordo polo que se autoriza a contratación, por parte do Servizo Galego de Saúde, da reserva e ocupación de prazas nas unidades de apoio comunitario para persoas con trastorno mental grave e persistente, polo procedemento aberto e trámite urxente, por un importe de 21.019.008 euros, para o período 2013-2017.

A reorganización da asistencia sanitaria ao trastorno mental grave e persistente en Galicia é unha iniciativa na cal a Administración sanitaria galega leva tempo traballando e que se enmarca no proceso posto en marcha polo Servizo Galego de Saúde destinado a completar e finalizar a reforma psiquiátrica na nosa Comunidade Autónoma. Así, o departamento que dirixe Rocío Mosquera Álvarez ten previsto aumentar o número de prazas dos dispositivos de rehabilitación comunitaria para persoas con trastorno mental grave e persistente.

Na actualidade os recursos concertados comprenden 904 prazas de Centro de Rehabilitación Psicosocial e Laboral, 42 pisos de apoio con 192 prazas e 87 prazas en unidade residencial. Para este ano, o Servizo Galego de Saúde ten previsto incrementar 10 prazas de Unidade Residencial na Mariña lucense. Cómpre resaltar que coa apertura de prazas na Mariña garántese a existencia de todo tipo de recursos (centros de rehabilitación psicosocial e laboral, pisos e prazas residenciais) nas catro provincias galegas.

Esta iniciativa supón unha clara aposta da Consellería de Sanidade e do Servizo Galego de Saúde pola atención a estes pacientes. Así, a pesar da crise económica, o incremento de prazas totais no período 2009-2013 é notable grazas ao esforzo orzamentario da Administración sanitaria galega. O dito incremento sitúase no 12,87%.