A Área de Cultura da Deputación colabora na edición do segundo disco de Escolma de Meus: “Dende San Roque ata o mar”

Lugo, 5 de setembro de 2013. O vicepresidente da Deputación de Lugo e responsábel das áreas de Benestar Social e Deporte, o nacionalista Antonio Veiga, participou, esta tarde, no teatro Pastor Díaz, na presentación do disco do grupo músico vocal de Viveiro “Escolma de Meus”, que leva por título “Dende San Roque ao Mar”, e que para a súa edición contou coa colaboración co organismo provincial.

O grupo musical Escolma de Meus naceu en Viveiro fai case dez anos e está formado por xente procedente de célebres orquestras da zona como Variedades, Os Píndaros ou Los Dominantes. Un grupo de voces acompañadas pola guitarra, o baixo, o violín e a percusión, que conta cun amplo repertorio de cancións.

O disco presentado hoxe recolle 14 deses temas, 8 en galego e 5 en castelán, entre os que se atopan habaneras e boleros, así como cancións tradicionais galegas que fan referencia á cidade de Viveiro e os seus arredores.

Durante a súa intervención, Antonio Veiga destacou “a tradición musical que sempre existiu en Viveiro, así como noutros puntos da comarca como é o caso de O Valadouro, que vén de celebrar unha homenaxe aos seus músicos coa publicación do libro Lembranzas Musicais do Valadouro” e agradeceu “o labor desenvolto polo grupo Escolma de Meus de cara á recuperación da tradición musical co que contribúe á súa presenza no panorama actual”.

“Iniciativas coma a levada a cabo polo grupo Escolma de Meus son necesarias de cara a posta en valor do noso patrimonio inmaterial e para a promoción da nosa lingua, para que temas como o himno popular de Viveiro, ‘Catro vellos mariñeiros’ se coñezan e se transmitan de xeración en xeración” concluíu o vicepresidente da Deputación.

Este é o segundo traballo para este grupo de amigos que se dedica á música por afección e sen ánimo de lucro, precedido polo disco ‘Rego de Sidro’, editado no 2005.