Concello e Xunta investirán 110.000 euros na reforma da metade da rúa Ramón González de Ribadeo

Ribadeo, 11 de setembro de 2013. Concello e Xunta investirán 110.000 euros na reforma da metade da rúa Ramón González, segundo deu a coñecer este mediodía o alcalde, Fernando Suárez, quen explicou que debido aos retrasos do goberno galego en comunicalo o Concello deberá axilizar agora os trámites para licitar e contratar estas obras canto antes.

O rexedor sinalou que “continuamos con esta idea e con esta política que levamos adiante nestes últimos anos convertendo a Ribadeo nun lugar agradable para vivir, para comprar e para pasear. Aquí se foron amañando e peonalizando unha serie de rúas, de espazos públicos e de avenidas. E agora, sabendo da dificultade económica que temos, pero a pesares diso queriamos continuar con outra das rúas, emblemática desde o punto de vista comercial, que é Ramón González”.

Suárez Barcia indicou que “o que pasa é que atendendo a estas subvencións que a Xunta ven dando e como rebaixou enormemente os presupostos globais de financiamento, decidimos presentar só un proxecto para a metade da rúa para esta anualidade e de cara ao ano seguinte plantexariamos a outra metade restante”.

O alcalde de Ribadeo dixo que “entre a Xunta e o Concello financiaremos uns 110.000 euros, que é o que custa a metade da reforma da rúa Ramón González, e dado que a Xunta o comunicou demasiado tarde teremos desde o Concello que axilizar os trámites de licitación e contratación para que esta metade da rúa sexa unha realidade o antes posible e para logo ver si o próximo ano podemos continuar ata o remate na súa confluencia coa avenida de Galicia”. E engadiu que “son as obras dunha rúa que hai tempo se podían facer todas dunha vez e agora ten que ser en dúas veces. O importante é que Ribadeo contará cunha rúa humanizada, con materiais nobres e modernos e atractiva para o comercio local, que é un dos motores económicos principais para esta vila”.