O BNG de Barreiros preguntará en Pleno cales foron os erros que motivaron a paralización da tramitación do PXOM

Barreiros, 27 de setembro de 2013. No pleno do vindeiro luns, o BNG de Barreiros preguntará ao Alcalde qué erros se produciron ao tramitar o PXOM para que tivera que paralizarse a súa tramitación e volver iniciarse neste mes de setembro.

Segundo os nacionalistas, “esta situación é unha máis das moitas que se viven neste concello como consecuencia do xeito de xestionar de Alfonso Fuente. O goberno de Barreiros está instalado na improvisación, nas présas por sacar anuncios adiante que tapen a incapacidade real para xestionar, aínda que só sexan cortinas de fume.”

Desde o BNG consideran que non é de recibo que “máis de tres anos despois de ter anunciado que se iniciaba a redacción do PXOM, o primeiro documento que se presenta vaia cargado de erros relevantes, en palabras do propio Alcalde. Parece que, tras a sentenza do TSXG que anulou o Plan Sectorial de Barreiros para a legalización das urbanizacións ilegais, Alfonso Fuente sentía a obriga de presentar algo para xustificarse ante non sabemos quen, aínda que fora unha auténtica chapuza e houbera que refacelo posteriormente.”

Desde o BNG insisten en que “o PXOM ten que servir para ordenar o territorio atendendo aos intereses das veciñas e veciños e non de coartada para legalizar pola vía dos feitos a política urbanística que se levou a cabo neste concello.”

O ximnasio municipal, as sancións de Contas ou a ordenanza de praias serán tamén temas do pleno do luns.
Ademais das preguntas relativas ao PXOM, o BNG interesarase tamén pola apertura do ximnasio municipal e polo persoal que se ocupará da xestión do mesmo.

Tamén preguntarán os nacionalistas polas sancións que Contas impuxo a Barreiros como consecuencia do incumprimento das súas obrigas na presentación das contas municipais.

Outro tema de debate que se inclúe na orde do día é a aprobación definitiva da ordenanza das praias. Segundo consta na documentación plenaria, o Alcalde non acepta ningunha das alegacións presentadas á mesma e propón a aprobación definitiva do texto inicial. Para o BNG de Barreiros “é unha mala nova para o conxunto da veciñanza de Barreiros que verá como se perde unha oportunidade para facer unha regulación ligada á realidade de Barreiros e que contribúa á reforzar a imaxe turística. Porén, como consecuencia da incapacidade para sentarse a falar, polo talante pouco democrático deste Alcalde que é incapaz de falar co BNG para tentar melllorar a ordenanza inicial, Barreiros terá unha regulación desligada da realidade das súas praias e con suficientes lagoas e incongruencias que pode xerar máis problemas dos que solucione”, afirman os nacionalistas.