O alumeado da unidade de actuación de Torrentes xa conta co visto bo da Consellería de Industria

Burela, 29 de outubro de 2013. O alumeado da unidade de actuación de Torrentes xa conta co visto bo da Consellería de Industria, segundo acaba de anunciar o alcalde, José Mª González Barcia.

O rexedor dixo que “hoxe mesmo déronnos o permiso correspondente do que estabamos pendentes. Agora o que toca é poñerse en contacto coa comercializadora e coa distribuidora e a partires de aí faremos o que eles nos digan. A urbanización vaise abrir ao tráfico, pero non depende de nós. Sen alumeado non se pode porque podería supoñer un risco”.

González Barcia agarda que “isto non se demore moito. En outubro non puidemos abrir a urbanización, pero os trámites e os pasos previstos seguen”.

O alcalde de Burela advirte que “tendo que conta que nesa urbanización non hai moitas edificacións, é dicir que a maior parte da unidade de actuación está sen edificar, aplicaremos criterios de aforro. Acenderemos as luminarias precisas para garantir a seguridade, pero nada máis. Non imos facer derroches nin de enerxía nin de cartos.