O BNG de Foz cre que a ubicación da depuradora en Forxán non é a mellor das opcións

Foz, 12 de outubro de 2013.- O BNG de Foz sae ao paso das declaracións do Alcalde no que anuncia un cambio da posición do Goberno Municipal respecto á ubicación dunha nova depuradora no Concello, apoiando a alternativa de Forxán do anterior goberno.

A necesaria separación de augas residuais das pluviais
O BNG sempre desde a responsabilidade política defendeu que a solución para as deficiencias no saneamento de Foz pasaba pola implantación dun sistema de separación previa das augas pluviais das residuais. Mesmo dentro do Plan Xeral se contempla como unha medida para mellorar os problemas co saneamento que ten Foz. Mágoa que compartindo esta opinión o PP na Xunta despois de cinco anos non fixera nada para resolvelo.
Por iso, desde o BNG instamos á Xunta de Galiza que contemple nos orzamentos dos vindeiros anos partidas significativas para ir implantando o sistema separativo de augas residuais á par da construción da depuradora.

Que a Xunta xestione o saneamento de Foz
Outra das esixencias que para o BNG é imprescindible é que a xestión do saneamento volva a mans públicas posto que a partir do ano 2017 remata a concesión coa empresa que a leva. Para o BNG, isto sería unha forma de asumir a Xunta a responsabilidade que tivo no seu momento, cando decidiu instalar a actual depuradora no Porto cos erros recoñecidos polo propio organismo de Augas de Galicia na medición de caudais e que trouxo as consecuencias que todos sabemos e sufrimos.

Por iso, o BNG insta á Xunta a asumir o saneamento do Concello e solicita do goberno municipal e da corporación defender de forma unánime esta posición diante da mesma. “O propio alcalde está entusiasmado do bo funcionamento da depuradora de Ribadeo que é de xestión pública. A Xunta pona como exemplo de boa xestión. Pois que se lle aplique o conto a Foz tamén”.

A mellor ubicación para o BNG sería no Polígono Industrial
Para o BNG é sorprendente que quedaran sen valorar as dúas últimas opcións que se deron por parte da Alcaldía e que en principio parecen mellores alternativas que a de Forxán. Hai que pensar que a situación en Forxán está nunha zona entre dúas praias bandeira azul, con gran tránsito de persoas e vehículos, con dúas areas recreativas ao lado, con vivendas a menos de trinta metros, pegada á liña de costa e por onde transcorre o paseo marítimo e se fan rotas tan recoñecidas de sendeirismo como a “rota das praias”.

Por iso, o BNG de Foz cre que a mellor das opción para situar a depuradora é sen dúbida o Polígono Industrial. Ademais de producir menos molestias estaría máis lonxe de vivendas. E ten a vantaxe de que os terreos son públicos e aforraríase en expropiacións. Polo menos, solicitamos que se contemple e se valore esta posibilidade por parte dos técnicos e para non ter que arrepentirse nun futuro.