Santín cumpre a palabra dada e pon en marcha a Secretaría da Militancia tan só dous días despois de ser elexido secretario provincial

O novo secretario xeral dos socialistas da provincia de Lugo, Juan Carlos González Santín, mantivo este luns a primeira reunión da executiva que saíu elexida o pasado sábado no congreso celebrado polo PSOE, logo de que José Ramón Gómez Besteiro acadase o liderado o partido galego. Deste xeito, González Santín cumpre a palabra dada ese día a todos os militantes, poñendo en marcha, tan só dous días despois da súa proclamación, a Secretaría da Militancia.

Neste senso, explicou que, dende o día de hoxe, todos os afiliados poderán dirixirse ó seu partido e trasladar as súas propostas, a través da web, do correo electrónico ou por carta tradicional, xa que existe unha persoa dispoñible –Leticia Seara- para atender as súas peticións que, posteriormente, serán debatidas pola executiva e contestadas de forma persoal. González Santín ofrece así un partido aberto, no que cada militante poderá dirixirse á executiva provincial con todos aqueles temas que lles interesen.

Retomando a premisa de “esta debe de ser a executiva da militancia. Pegada á realidade, implicada e comprometida”, o novo líder dos socialistas de Lugo marcou este luns a folla de ruta ós novos representantes orgánicos do PSOE para dicirlles que hai que “ser a alternativa” e comezar a traballar de cara ás eleccións de 2015, fixándose como reto recuperar o maior número de alcaldías posible. A este respecto, reiterou que “xa nos puxemos mans á obra. Estamos para axudar, para traballar a reo, para que non falte de nada en cada agrupación. Será a cita do cambio na provincia, o cambio operado polo PSdeG, e avanzado na Deputación. Nos concellos onde gobernamos, deberá de consolidarse, e nos que non temos a responsabilidade de goberno, debemos alcanzala e demostrar o que sabemos facer. Empezamos xa. É o noso momento”.

Sentar as bases e novas indicacións para os departamentos creados
A nova executiva provincial acadou o 84,16% dos votos. Ademais de cumprir os criterios de paridade do partido e de incorporar un alcalde e á única alcaldesa socialista da provincia, tal e como xa fixo no seu día o novo líder dos socialistas galegos, Santín configurou novas secretarías en resposta ós obxectivos fixados no seu discurso. Deste xeito, ademais da Secretaría do Militante, creou entre outras as de Transparencia e Bo Goberno; de Economía e de Cultura e Pensiòns; o que supuxo unha renovación do 30%.

Neste senso, o novo líder dos socialistas lucenses aproveitou a xuntanza para sentar as bases do seu proxecto e definir as principais liñas de actuación tanto das áreas que decidiu manter e que foron creadas o pasado ano por Gómez Besteiro, como das de nova creación. “Queda moito traballo por diante. Neste primeiro encontro quería trasladar ó meu equipo por onde ten que remar este partido. A partir de agora, pasaremos á acción. Comeza unha etapa ilusionante para o PSOE e para a provincia”, concluíu.