Villares lamenta que a Deputación como promotora da reunión do Padroado non propuxese medidas concretas para axudar a Sargadelos

Cervo, 12 de decembro de 2013- O alcalde de Cervo, Alfonso Villares, asistiu este xoves á reunión extraordinaria do Padroado de Sargadelos celebrada na Casa da Administración. O rexedor asegurou que “asistín a esta xuntanza porque fun convocado a ela” pero engadiu que “o Padroado ten moi limitado o seu ámbito de actuación, e está pechado a todo o relacionado co Conxunto Histórico-Artístico de Sargadelos”. Así que “calquera outra cuestión, como o que preocupa agora mesmo que é a situación económica da empresa e o despedimento de 41 traballadores, queda fóra das súas atribucións”.

Aínda así, o mandatario cervense lamenta que “a administración promotora desta reunión, a Deputación, non puxese sobre a mesa ningunha solución concreta, a pesar de que foi ela a que insistiu en celebrar a xuntanza e a pesar tamén de que ten na súa man unha proposta concreta do Concello de Cervo”.

De todos modos, o primeiro edil asegurou que “dende o Concello seguiremos apoiando aos traballadores de Sargadelos, e velando pola continuidade da planta de Cervo, como vimos facendo dende que se fixo pública a situación”.